تم ترقية المراقب أمير بكلمتى والمراقبة ملكة الاحزان الى رتبة نائب مدير وذلك للأرتقاء بمستوى وحالة المنتدى

(( فى الجامعة ))

هو - بحبك

هي = طيب

هو -باقولك بحبك

هي = أوكى عرفت خلاص

هو - يابنى ادمه انا بحبك بجد

هي = طب وانا اعمل ايه.؟

هو -حبينى زى مابحبك

هي = انا باعتبرك اخ وصديق ومابافكرش فيك غير كده

هو - انتى متحجرة الاحساس والمشاعر..تلاقى فيه حد تانى فى حياتك

هي = وهو لو انا ما حبيتكش يبقى بحب غيرك؟؟ تفكير غريب جدا

هو - ارجوكى ادينى الفرصة..افتحى قلبك لحبى وجربى,
ماتظلمنيش..لو ماحبيتينيش انا هاموت نفسي

هي =لا وعلى ايه..خلاص ياسيدى ..اعتبرنا مرتبطين مؤقتا

هو - هاعيشك ملكة متوجة على عرش حياتى كلها..أنا ليكى وملك ايديكى..احلمى وأحلامك أوامر

--------------------------------------------------------------------------

(( فى البيت ))

هي = معقول يكون فيه حد ممكن يحبنى الحب دا كله؟؟
طب أنا رافضاه ليه؟
مش ممكن تكون سعادتى معاه؟
انسان رائع..رقيق..حساس وبيحبنى
أنا هاحبه زى ماهو بيحبنى..لأ..أكتر ماهو حبنى

--------------------------------------------------------------------------

(( على التليفون ))

هو -عازمك النهارده على الغدا والسينما

هي = افندم؟؟

هو - ايه..كلامى غامض؟

هي = انا اسفه..ماقدرش اخرج معاك مادام علاقتنا مش رسمية

هو - اتنين بيحبوا بعض ومن حقهم يتشاركوا اللحظات الحلوه مع بعض..دى خروجة بريئه.. عاوز نكون على راحتنا مع بعض

هي = مش هاينفع

هو - يبقى انتى مش بتحبينى

هي = طب قولى انت..لو انا اختك..هاترضى انى اخرج مع واحد تانى غريب؟

هو -( بغضب) لأ طبعا..دانا كنت قطمت رقبتك

هي = امال عايز تخرج معايا ليه؟

هو -آآه.. دى حاجه ودى حاجه تانيه

هي = هو انا مش بنت ناس برضه وليا أخ؟؟

هو - أنا مش هاثق فى أى حد تانى..لكن انا عارف نفسي وانتى عارفانى

هي = المبدأ واحد.. أخويا برضه ما يعرفكش

هو - انتى بتثبتيلى دلوقتى انك مش بتحبينى..متشكر قوى على الجرح اللى سبتيه جوايا

هي = وهو يا كده يا إما مش بحبك؟

هو - انتى مش واثقه فيا..وانا بحاول اعمل المستحيل عشان أسعدك..ليه ياربى عذبتنى بالحب؟ليه خلقتلى قلب وعلقته بانسانه قاسيه مش مقدره حبى؟

هي = خلاص خلاص..أنا اسفه..بس اوعدنى انك مش هاتكررها تانى

هو - خليها لوقتها..هاستناكى قدام السينما الساعه 6 بالليل

--------------------------------------------------------------------------

(( فى البيت ))

هي = معلش..تضحية صغيره مش هاتضر حد..ماكانش لازم اكسر قلبه واقابل حبه بقسوه
هو اللى عملته ده صح ولا غلط؟
..بلاش أفكر كتير..هو بيعمل كده عشان بيحبنى وعايز يسعدنى..هدية بسيطة منه مش لازم ارفضها
ماحدش بقى بيحب الحب ده كله فى زماننا ده

--------------------------------------------------------------------------

(( فى السينما ))

هي = انت مش قلتلى انه فيلم خيال علمى؟؟
دا طلع فيلم رومانسي

هو - حبيت اتفرج عليه انا وانتى..قصته رائعه..وكأنها اتعملتلنا

هي = ومالقيتش مكان أحسن من اخر صف فى القاعه؟

هو - أعمل ايه بس..جينا متاخرين والصفوف قدام كلها محجوزة

هي = الصاله شبه فاضيه..كلامك مش مريحنى

هو - ارجوكى بقى..احنا هانقلبها خناقه ولا ايه..عيشي معايا اللحظه

هي = ايه ده؟..ايه السفاله دى..ابعد ايدك عنى..انت بتعمل ايه؟

هو - انا بحبك قوى..صعب أتحكم فى نفسي وكل جمالك ده
قدامى..نفسي أشوف شعرك..اقلعى الايشارب

هي = انت اتجننت؟
والله لو ما لميت نفسك هافضحك فى السينما كلها

هو - يبقى هاتفضحى نفسك اولا واخيرا..الناس شايفينا داخلين مع بعض وقاعدين مع بعض..انتى فاكره انهم مش فاهمين احنا دفعنا بقشيش زياده عند الشباك ليه؟؟

هي = انت دفعت لوحدك وانا رحت اجيب الفيشار, واتفاجئت لما لقيت رقم التذاكر بتاع القاعه دى والصف الأخرانى ده

هو - انا بحبك وباموت فيكى.. عايز اترجم الحب ده لواقع..أنا ملكك وانتى ملكى,روح واحده فى جسمين..خلينا نتعامل كجسم واحد

هي = اللى انت بتعمله ده حرام

هو - انا بحبك..وحبى ليكى هايفضل موجود دلوقتى وبعد ما نتجوز..هاتفرق ايه أكتر من ورقة مأذون؟؟
انتى مش واثقه فيا ولا انتى مش بتحبينى؟

هي = حبك عاوزنى أكسر كل اللى اتربيت عليه

هو - الزمن دلوقتى غير الزمن..وانا وانتى شباب مثقف, وانا مؤمن باحتياجاتك زى مانتى عارفه ان ليا احتياجات
اكتر حاجه عجبتنى فيكى أفكارك الحرة المنطلقة وثقافتك العالية وشخصيتك المستقلة..لكن اللى شايفه دلوقتى واحده شرقية بفكر متخلف بترمى كل أفكارها ورا ظهرها لحظة الاختبار الحقيقى..أنا اسف على كل لحظة افتكرتك فيها بتحبينى بجد..انا حظى كده..كل ما أعمل حاجه أحاول أثبت حبى ليكى بيها تفسريها تفسيرات بشعه وتطلعينى أنا الغلطان فى الاخر

هي = أنا عارفه انك بتحبنى..وانا كمان بحبك...لكن...انا..مش

هو -بحبك وبحب كل حاجه فيكى..انتى جميله قوى

هي = انا حاسه ان كل الناس بتبص علينا

هو - ماتخافيش ..طول مانتى معايا مالكيش دعوه بحد..دى حياتنا وهانحب بعض بطريقتنا

--------------------------------------------------------------------------

(( فى البيت ))

هي = تأنيب ضمير فظيع جوايا..انا ايه اللى عملته ده؟؟
عقلى كان فين لما وافقت؟؟..
يارب سامحنى أرجوك..ماقدرتش استحمل كل الضغط ده على اعصابى

--------------------------------------------------------------------------

(( فى الجامعة ))

هو - ها يا حبيبتى..تحبى نروح فين النهارده؟

هي = مش رايحه فى حته وكفايه بقى لحد كده؟؟

هو - ايه الكلام ده يا حياتى؟

هي = كفايه أرجوك..حاجات كتير قوى جوايا اتغيرت بسببك..بقيت مش أنا.. كلامك دايما هو اللى بيمشى حتى لو انا رافضاه

هو - كلامك ده اكبر دليل انك مش بتحبينى

هي = ارحمنى بقى من الكلمه دى..انت بتحطنى تحت ابتزاز عاطفى بشع وكل ما أحاول ارجع لنفسي تتهمنى انى مش بحبك .. انا عملت كل حاجه ممكنه عشان مش عايزه اخسرك..اتنازلت عن حاجات كتيره قوى..ضعفت قدام توسلاتك

هو - انتى اللى كنتى عايزه كده..كل مره ترفضى وتتمنعى, وبرضه فى الاخر توافقى..انا ماضربتكيش على ايدك وما اجبرتكيش على حاجه

هي = بعد كل الابتزاز العاطفى ده؟؟

هو - ماحدش يقدر يجبر حد على حاجه..كان عندك مطلق الحرية انك ترفضى

هي = مع كل الضغط ده..ماكنتش قادره افكر

هو - ماتحاوليش تلعبى معايا دور القديسة اللى الشيطان غواها..انتى تلاقيكى اصلا كده..كلكم كده وتستاهلوا اللى يجرالكم

هي = انت حيوان بتمشيه رغباته..

هو - انا عمرى ما ضحكت على نفسي ولا عليكى...بالعكس بقى..انا استحملتك كتير قوى..استحملت عندك وسخافتك ورفضك..وكل مره باقول بكره هاتعقل..دلوقتى أنا اللى باقولك مش عايزك..ولا عايز أشوف خلقتك تانى ولو بالصدفة
وماتحاوليش تحكى لأى حد على اللى كان بينا..لأن اللى هايتحرق بالنار فى الآخر هو انتى..هى دى سنة الحياه
باى ياى يا........ياللى عمرى ما حبيتك

يا ساتر اية اللي بيحصل دة
انصحيهم لحسن يحصل معاهم كدة
موضوع جميل

لا حول ولا قوة الا بالله انسان متخلف سافل اللى يفكر يعمل زى ده وربنا اتعصبت وانا بقرا اللهم ارحم شباب وبنات المسلمين وارحمنا من الفتنة وابعد عننا كل شيطان امين
تسلم على موضوعك وعايزين دايما توعية

بصراحه اللي يعمل كده مع انسانه يبقي شب واطي اسف في الكلمه
بس انا عاوز اعرف حد عمل كده وانا هعلمه ازاي يبطل يعمل كده تاني

ميرسى على ردك ياسامو وبنت البحيره وpolice واوعدك يابنت البحيره ابقى اجيب مواضيع توعيه تانى

و الله يا همس انا لو وحده مسمعتش كلامي حسبها فورا مش حتحايل عليها كتير  الواد ده حمار هيا الكلمه من مره واحده منفزتهاش مع السلامه في غيرها ينفذها بس باردوه مينفعش حد يحب حد اوووي و يعمل في كده ايه تعالي السينما و ايه الكلام ده هو لو بيحبها حيحافظ  عليها اكتر من اي حد و مش حيستني حد يقول عليها كلمه او نصف كلمه وحشه
و علي فكره يا همس الحياه انتي واخده فكره وحشه اوووي عن الشباب ؟ ليه؟

والله ياعمرو انا مش واخده فكره وحشه عن الشباب بس مش تنكر ان فى ناس وحشه كده وثانيا هو مش حبه لو حبها مكنش فكر انه يعمل معاها اى حاجه ويحافظ عليها زى ماقولت

اكيد طبعا فى شباب من النوعيه دى محتاجين الحرق
مسؤائين سمعتنا
ربنا يستر علينا
وبجد مواضيعك كلها جميله قوى وهادفه ياهمس الحياه
متحرميناش من مواضيعكى الجميله دى
وكمان عايز اشكرك بشكل خاص عن التوبك ده
بس متقلبيش علينا قوى كده

اوكى يونس وشكرا على مرورك

انا على فكره فى معهد خدمه اجتماعيه اسكندريه و الكلام ده بيحصل قدامى كل شويه و كتير اوى و مش من الصبيان بس و بالعكس ده فى بنات بتطلب اكتر من كده ( الا من رحم ربى ) و ربنا يستر علينا و على شباب امتنا
موضوع جميل و كويس انك عرضتيه علشان اللى ماشافش الكلام ده يشوفه

الكلام ده بيحصل كل يوم وبعدين الزمن ده بقي اسود
اقف علي باب اي سينما وانت هتشوف البدع كبيرة وصغيرة
بس اكتر الحاجات دي بتبقي برضي الطرفين
وربنا يستر

» بحبك يا مصر
» بحبك
» بحبك عند
» بحبك
» انا.......انت مين ( بحبك يا مصر )

تم ترقية المراقب أمير بكلمتى والمراقبة ملكة الاحزان الى رتبة نائب مدير وذلك للأرتقاء بمستوى وحالة المنتدى

اقتراحك يهمنا

مش اى حد يقولك بحبك تصدقيه!!!!