أحلى هدية فى عيد ميلادك

فى عيد ميلادكْ العشرين
أهديكِ وردة من أحلى البساتينْ

أهديكِ دمعة حب نازلة
من القلب مش من العينْ

أهديكِ كل لحظة حلوة
عشنا فيها احنا الاتنينْ

أهديكِ عمرى ياكل عمرى
ويبقى عمركْ بعمرى عمرينْ

أهديكِ وعد منى إنى
أفضل أحبكْ طول السنينْ

أهديكِ بسمة على شفايفكْ
مش عاوزها تغيب عن الشفتينْ

أهديكِ نسمة على ضفايركْ
وحمرة خجل على الخدينْ

أهديكِ شوقى لنظرة عينيكِ
وشوقى لكلامكْ ولمسة الإيدينْ

أهديكِ قلب يفضل يحبكْ
ويضخ حبكْ فى الشرايينْ

أهديكِ لحن كتبته بدمعى
السهران على الأشواق والحنينْ

مش عاوزكْ تنسينى إفتكرينى
لو مرة وحيدة كل يومينْ

وأنتِ هتفضلى عايشة جوايا
ذكراكِ هتفرَّح قلبى الحزينْ

أيوه فرَّق بينَّا القدر بس
لازم نكون بنصيبنا مؤمنينْ

ياريت تقبلى هديتى يادنيتى
وأوعدكْ أفضل لحبكْ أمينْ

* - * - * - *

بقلم / حسام رجب