العيد صبحك والهدية حضورك
ياللي بشوفك يصبح العيد غاية
يشتاق فجر العيد ريحة بخورك
وأشتاق قولك: (عيد وأنتِ معايه)
ألبس وأغير وأتخيل شعورك
وأمشط وأطيب ما هجرت المرايه
تشرب ثيابي العطر لحظة ظهورك
وأسكر بعطرك لا تخلل هوايه
أروح وأرجع أتحرى مرورك
أفلّ شعر القلب وأضفر شقايه
أردد أبياتك , وأقطع بحورك
أبغى التفوق في الغلا ياغلايه
الله يوم أشرق على القلب نورك
أجهر حروفي ,دسّ شعري ورايه
تفتح بشوفك في خدي زهورك
تبي تحس في نظرتك بالرعاية
كلي أمل أحظى ابسمة سرورك
وأقرأ في وجهك ما يسطر هنايه
،
العيد ما هو يوم واحد ب شوال
العيد يا عذب الكلام ب وجودك
العيد فرحة شايب وبنت واطفال
العيد مركب ما رسى في حدودك
العيد ذكرى فيه لمحات لأجيال
العيد دعوة حب لأول جدودك
العيد غاده لوعت قلب رجال
العيد رجل ٍ ذاق حالي وعودك
العيد طفله جايره مترفة حال
العيد طفله عايشه في جمودك
العيد دمعة طفل والجوع قتال
العيد طفل باكي ٍ من جحودك
العيد يا ورد ٍ نبت ب اشهب الال
العيد رشة من عطر في خدودك
العيد فيه الحظ مايل ولا مال
العيد انسى شوي اخر صدودك
العيد آمال بنا حلمها فال
وكل الأمل عيد ٍ سعيد ووجودك