رساله من شهيد

وحشانى يا امه واحشنى حضنك وكل ضمه
وحشانى مصر وشوارعها واللمه
عارفه يا امى واحشنى اوى الميدان اللى رويته بدمى
واحشنى كل الكلام...حريه ويسقط النظام
يااااه يا امى فاكره لما كنت فى حضنك بنام
فاكره لما كنتى بتقوليلى عاوزه يا واد افرح بيك
واشوف ولادك حواليك
عارفه يامه مع انى مت فى يوم الحنه
كانت احلى زفه زفتى للجنه
متبكيش يا امه مش كنتى دايما بتدعيلى يا رب اشوفك سعيد وتتهنى
طب وهو فى سعاده بعد الجنه
وحياتى يا امه بلاش دموعك تسكن عنيكى
وقولى لكل اللى بيعزوكى ابنى عند ربه حى ومش هيموت
برغم ان الرصاص كان حى ومكنش طلق صوت
وقولى لاخواتى فى الميدان احلى موته الشهاده فدى الاوطان
سامعهم بيهتفوا ام الشهيد امى...دم الشهيد دمى
والله رجاله اوى يا امى
بلاش يا امى شريط اسودعلى الصوره
خليه بلون علم مصرنا المنصوره
عارف اد ايه حلوه اوى الحياه بس الاحلى لما تكون عند الله
خلوا بالكوا اوى على مصر وقولى لكل اللى فى الميدان
ان الثوره يعنى النصر
تحيا مصر...تحيا مصر