جاااامده موووت يبقي انتا اكيد في مصر ؟؟؟ مصر....:::؟؟ فين

بصوا من الآخر كده انا ملييش نفس اعمل أي حاجة في الدنيا يعني انا الخنقة اساسا وصلت بيا آخرها زيي زي كل الشعب المصري ...بس انا الجرعة عندي زيادة شوية ...يقوم منه لله عم احمد الزلنبحي البقال عندنا مشغل التليفزيون المصري لفتت نظري الأغنية اللي شغالة ...اغنية اسمها ...يبقى انت اكيد في مصر .


في البداية طنشت شوية ...وبعدين ركزت ..وركزت اكتر لقطت كلمتين من الأغنية ما معناه ...لما الحفيد يشد ايد جده ويقوله يلا يا جدي نصلي العصر ...يبقى انت اكيد اكيد في مصر .
هاهاهاهاهاهاهاهاهاهاهاهاهاهاه والنبي ايه حلوة دي ....يعني لو عيل صغير غلط واتخبل في عقله في الصومال مثلا وقال لجده تعالى نصلي العصر ...حيبقى بقدرة قادر تنقلب الصومال مصر علشان يبقوا اكيد في مصر .
والله اللي كتب الشعر ده دماغه لاسعة ( مع الأعتذار لقارئتنا المتميزة لاسعة ) .انا بقى لا شاعر ولا بفهم في الشعر ده لكن اللي اعرفه ان عندي حاجات كتير مش ممكن بجد مش ممكن تحصل لو حصلت إنك تقول غير حاجة واحدة ....تقول يبقى انت اكيد في مصر .

لو البلد تعبانة و44% من سكانها يعيشون تحت خط الفقر وفيها عبارة غرقانة وانفلوانزا الطيور ومع كده رئيسها يطلع في حوار صحفي والمذيعة تسأله انت مرتاح لوضع البلد ...فيكون الجواب مرتاح اوي ......يبقى انت اكيد في مصر ( يلا .... حتة من ورا ظهر الرقابة واللي يلحقها يلحقها )

لو لقيت الظابط ماسك شيخ عمال يديله على قفاه في مظاهرة ....يبقى أنت أكيد في مصر .( مظاهرة من مظاهرات الأصلاح في طنطا ظهر فيها ظابط يضرب شيخ معمم ...بجلباب وكاكولا ويضربه على قفاه )
لو لقيت نص شبابنا بيضرب بانجو وحشيش عـ القمة ......يبقى أنت أكيد في مصر .
لو صندوق زبالة فاضي والناس رامية الزبالة جنبه ...يبقى أنت أكيد في مصر .
لو لقيت غطيان البلاليع في الشارع مسروقة وصناديق الزبالة مسروقة ولمض النور عـ السلالم مسروقة وشارع بحاله في محطة الرمل لبيع الموبايلات المسروقة ...يبقى أنت أكيد في مصر .
لو لقيت بلد تعبانة وموجوعة وشبابها همه في الدنيا روبي وهيفاء ......يبقى أنت أكيد في مصر .
لو لقيت رغيف العيش فيه دبارة ومسمار وجناح صرصار ..يبقى أنت أكيد في مصر .
لو لقيت البطيخ مسموم والعنباية قد التفاحة والتفاحة لا طعم ولا ريحة والخوخة منقعوة في الكلور والمية اللي نازلة من الحنفية ريحتها مجاري .....يبقى أنت أكيد في مصر .
لو حبيت تعرف اللي بيحصل في بلدك لازم تشتري دش وتعرف من بره بلدك عن طريق الفضائيات ....يبقى انت أكيد في مصر .
لو البلد تعبانة و44% من سكانها يعيشون تحت خط الفقر وفيها عبارة غرقانة وانفلوانزا الطيور ومع كده رئيسها يطلع في حوار صحفي والمذيعة تسأله انت مرتاح لوضع البلد ...فيكون الجواب مرتاح اوي ......يبقى انت اكيد في مصر
لو مشيت على طريق مصر اسكندرية ولقيت مدن وبيوت طويلة عريضة وقرى سياحية ...فاضية ومهجورة وصحابها ما بيسكنوهاش غير اسبوعين في الصيف ....ومشيت في شبرا ولا الحضرة ولا كرموز ولا غيط العنب ولقيت الناس عايشين في اكشاك خشب وصفيح .....يبقى انت اكيد في مصر .
لما 90 % من الموبايلات اللي بتقع من صحابها في الشارع او في المواصلة اللي بيلاقيها ما بيرجعهاش وياخدها ويقبلها حرام على نفسه ....يبقى انت اكيد في مصر .
لو لقيت شعب عمال يفتخر انه شعب متدين وبتاع ربنا واكتر بلد فيها الأسلام وبلد الأزهر ...ومع كده سب الدين شيء من العادي انك تسمعه في الشارع يبقى انت اكيد في مصر

لو لقيت الأتوبيس فاضي ..والشارع نظيف ...والناس إيجابية ...والأكل

والله ياعمرو عندك حق

انزل بص بس في الشارع هتعرف انك بجد في مصر

ثانكس

أيوة ياعمرو هو ة اللي بيحصل

أحنا أكيد في مصر

فعلاً دي مصر الي أنا أعرفها

شكرا علي مروركم و فعلا ديه مصر تحيا مصر

شكرا عمرو
يبقى انت اكيد فى مصر؟

شكرا يا احلي شباب علي مروركم

ولما تلاقي الناس ساكتين وكل واحد يقولك خاليني في حالي ماليش دعوه وهو مطحون من مافيا دروس خصوصيه لفواتير كهربا في العالي لفواتير تليفونات في الدمار لكيلو العدس ب11 جنيه واسمه عدس برده .لبطاله شباب لناس بتقتل بعض علشان رغيف العيش ودلوقتي بقه في ناس مش بتاكل لحمه خالص واسر عايشه في الشارع ولما تلاقي الشباب محبط ومش لاقي حاجه يعملها غير القعده علي القهاوي والكافيهات ولما تلاقي البسمه راحت من وشوش الناس الي ماشين في الشارع
ساعتها اتأكد انك في مصر المعموره.
ومافيش في ايدينا غير حسبنا الله ونعم الوكيل

فعلا احدت يا عمور انك تكتب اللى فى نفسك بدون خوف
وعلى فكرة انت شكللك مقروص من موضوع الموبيلات ده
على العموم العيب مش على مصر كوطن ولكن الفساد



موضوع جميل تحياتى

لا يا عم ابراهيم انا الحمد الله مش مقروص بس ديه فعلا اللي موجود في بلدنا و شكرا شباب علي مروركم

مرسي عموره
وزى ماكله قال فعلا دى مصر
وانت أكيد فى مصر

هههههههه شكرا ابوعلي

يااااااااه تصدق ياعمور اول مره اكتشف اني فى مصر.. دانا كنت مفكره نفسى فى الصومال..

بقى هى دى بقى مصر؟؟؟؟؟؟؟

انا اكيد فى مصر..

ثانكس عمور على الموضوع الجامد ده

شكرا عازفه بس ازاي متعرفيش انك في مصر ؟؟؟

فعلا دي مصر
وعلى راي المثل الشرطه في خدمة الشعب
هههههه
وشكرا عمووووووووووور

شكرا شريف علي مرورك