دمنهور.. مدينة الآلام والأحلام .. والمشاكل

<div style="margin:auto;text-align:center;width:100%">
دمنهور..مدينة الآلام والأحلام والمشاكل!

رداءة الخبز وانتشارالقمامة والبلطجة وارتفاع الأسعار و الإيجار الجديد و فواتير المياه والكهرباء والتليفون وتعريفة التاكسى والشوارع غير المرصوفة.. مشاكل مزمنة!

تحقيق:
إيهاب الحمامصى


دمنهور.. الدم ..نهور.. مدينة لها من اسمها نصيب..بل نصيب وافر.. لم تعرف يوما طعم الراحة من المشاكل.. يشعر فيها الماشى والراكب أنه بصدد انسحاب مفاجئ – مثل انسحاب نكسة 1967- قبل حدوث هجوم ما مباغت.. بعض شوارعها ومناطقها وصلت للعالمية مثل شوارع روما وصقلية ونيويورك.. قد يفاجئك فيها مجموعة من الشباب – المافيا المحلية - يستوقفونك ثم يطلبون المحفظة والموبايل والساعة بشكل ودى وإلا فإن "قرن الغزال" والفرد الخرطوش سيبدآن بالعمل.. او يقومون بنزع – لا خطف- سلسلة زوجتك الذهبية.. وان كانوا أقل جرأة فهم يقومون بالوقوف عند محطات الباص الداخلية او محطة القطار لنشل ما خف وزنه وغلا ثمنه!.. مثل ذلك الشاب الرث الهيئة الذى صورناه بفيديو الموبايل وهو يحاول نشل ركاب الباص الداخلى بأهم ميادين دمنهور – ميدان الساعة - فلما شعر بنا أخذ يناور كالثعلب الخائب ثم ابتعد قليلاً وأخرج موبايل لابلاغ باقى التنظيم انه قد تم كشفه وتصويره! فابتعدنا فوراً قبل ان تحاصر عصابته المنطقة! ولعل السرقة والنشل أخف وطاة من الاغتصاب والقتل فى وضح النهار..!
قمنا باستطلاع عينة من شعب دمنهور حول أرائهم فى هذه المشاكل وباقى المشاكل التى تعانيها مدينتهم " العريقة " التى طالما شهد لها التاريخ بمواقفها فى محاربة طغيان المحتل:


الشوارع غير المرصوفة والنظافة.. كلاكيت مليون مرة!
فى البداية يقول رمضان الغرباوى – مراجع بالضرائب العامة – ان دمنهور تعانى من عدة مشكلات مزمنة منها على سبيل المثال مشكلة الطرق غير المرصوفة مثل بعض شوارع شبرا وشارع حسين حجازى الذى يصل شطرى المدينة مروراً من تحت نفق السكة الحديد وشارع المقريزى وهذه الطرق على حالها من زمن طويل تعانى الاهمال واللامبالاة وانتشار القمامة حتى فى المنطقة الواقعة خلف المحافظة والمفترض انها تتميز عن باقى مناطق المدينة كونها قريبة من مقر صناع القرار ويضيف مصطفى الحلوانى قائلاً : كيف لا يجد المسئولون حرجاً فى عدم وجود حاويات قمامة ؟ الأمر الذى دفع الأهالى الى القاء قمامتهم بالشوارع بشكل يسئ للذوق الانسانى السليم وقد يختفى عمال النظافة لاسباب عديدة خاصة فى مثل هذه الايام من السنة حيث يتغيبون عن عملهم الرسمى ويفضلون الذهاب الى الحقول لجنى المحاصيل الزراعية حيث الأجر الأعلى او يكون اختفائهم لسبب أخر مثلاً عند زيارة مسئول رفيع للمدينة فيتم سحب جميع عمال النظافة من مناطق المدينة المختلفة و اهمال كافة المناطق البعيدة عن خطوط سير ذلك المسئول!


والشئ الوحيد الذى لم تهمله المحافظة ومجالس مدنها هو تحصيل مبلغ 4أربعة جنيهات من كل وحدة سكنية كرسوم نظافة! وشر البلية فعلا ما يضحك!

اختفاء الرقابة على الاسواق
صلاح محفوظ وزين عبدالفتاح يقولان: ان هناك مشكلة تؤرق كل بيت مصرى بصفة عامة والبيت الدمنهورى بصفة خاصة الا وهى مشكلة ارتفاع الاسعار لمعظم السلع والمواد الغذائية وغير الغذائية وأن الحكومة نفضت يدها من فترة طويلة من الرقابة على السوق تاركة الباب على مصراعيه لمن أراد اللعب بأقوات الناس وارزاقهم ورغم الكساد الذى يسود العالم وادى لانخفاض الاسعار بشكل لم يسبق له مثيل نرى الاسعار فى مصر تتجاوز حدود المعقول بشكل مذهل نتيجة للعشوائية المصرية ناهيك عن غياب الرقابة الصحية والتموينية ويضيف علاء سلام وكمال الدين فتح الله أن غياب الرقابة الصحية والتموينية واضح بشكل كبير خاصة مع نقص وزن رغيف الخبز ورداءته بشكل ظاهر حتى اصبح عصياً على المضغ والبلع- هذا اذا وصل لمستحقيه- ويطالبون بوضع حد لسوء التعامل مع " نعمة ربنا" حيث يقوم اصحاب الافران برص العيش بعد خروجه من الفرن على الارض أثناء عمل الفرن فى الساعة الثانية عشر ليلا يومياً على مراى ومسمع من كافة المسئولين حيث يكون نهبا للقطط والكلاب الضالة وتراب الشوارع والقمامة وعوادم السيارات بما فيها من رصاص البنزين السام أضف الى ذلك قذارة العمال انفسهم وعدم التأكد من نظافتهم!


مصيبة الإيجار الجديد!

عبده عبدالهادى-مامور ضرائب.. يقول: ان من اكبر وأخطر المشاكل التى تواجه مصر عامة والبحيرة خاصة هى مشكلة ارتفاع الإيجار الجديد وما تمثله من خطر على الأمن القومى المصرى بالاضافة لمشكلة البطالة فارتفاع ايجار الشقق فى ظل قانون العلاقة بين المالك والمستأجر الجديد يمثل عائق وتحدى آخر امام الشباب ولم تجد الأزمة المالية العالمية نفعاً فى الحد من هذه الظاهرة المخيفة رغم وجود الآلاف من الشقق المغلقة فى كل مدينة ولعل مصر هى الدولة الوحيدة التى يفخر ملاك العقارات فيها بقدرتهم على بناء طوابق جديدة باعتبارذلك دليلاً على الثراء وأيضاً باعتباره استثماراً مستقبلياً –رغم ان هذه الطوابق والشقق قد تظل غير مسكونة لعشرات السنين- وتتميز دمنهور عن غيرها – وحتى الأسكندرية – بارتفاع جنونى فى أسعار العقارات سواء الأراضى او المبانى "بيع او ايجار" ويطالب بتشريع جديد للاستفادة من هذه الشقق المغلقة ووضع سقف أقصى للايجار حسب تشطيب الشقة وموقعها ومساحتها وان يمتد التنظيم العمرانى للأراضى الخلاء وادخال البنية التحتية بدلا من تلك العشوائية الرهيبة التى ادت الى ارتفاع أسعار الأراضى الزراعية فى سبيل تحويلها الى أراضى بناء وبالتالى ارتفاع أسعار المواد الخام اللازمة للبناء مثل الأسمنت والحديد ناهيك عن القضاء على ثروة مصر القومية التاريخية من أجود الأراضى الزراعية فى العالم.!


تاكسى دمنهور .. يا تاكسى العذاب!

محمود عبدربه وسعد جميعى – الضرائب العامة يقولان : أن من المشاكل الى تختص بها دمنهور عن غيرها من المدن عدم توفر وسائل مواصلات لكل أرجاء المدينة حيث يرفض سائقى التاكسى الذهاب لأطراف المدينة مفضلين العمل داخل نطاق وسط البلد فقط لتحقيق مكاسب سريعة بالاضافة لقيامهم بفرض تعريفة ركوب جديدة وتحميلهم اكثر من راكبين لكل مشوار وفرض التعريفة الجديدة على كل راكب على حدة والعمل بالمزاج بمعنى ان السائق يقوم بعمل دراسة جدوى سريعة لكل راكب وما اذا كان سيتفضل بالموافقة على ركوب الراكب من عدمه بغض النظر عن ظروف هذا الراكب.. حتى بات ركوب تاكسى دمنهور امنية عزيزة! ويتساءل عن دور المرور فى هذه المشاكل .. وهل يتعين على كل متضرر الذهاب الى إدارة المرور بالطريق السريع لتقديم شكواه وكيف يذهب والسائقون يرفضون أصلا الذهاب لأطراف المدينة كما سبق القول؟! ولماذا لا تكون الشكوى لجندى المرور فوراً ومباشرة ويتم اتخاذ إجراءات سريعة مثلما يحدث فى بعض المدن كشرم الشيخ مثلاً؟!!

الخصخصة ونهب الغلابة

اما جمال الطباخ ومحمد صالح فلهما وجهة نظر أخرى: ارتفاع فواتير الشركات التى تم خصخصتها مثل الكهرباء والمياه والاتصالات.. وهذا الارتفاع الجنونى لفواتير هذه الشركات لم يحدث تحديدا الا بعد الخصخصة وهو فى تزايد منذ ذلك الحين دون الرجوع لأحد باعتبارهم محتكرين لهذه الخدمات فى ظل عدم وجود منافس سواء للتليفون الثابت او الكهرباء او مياه الشرب والصرف الصحى وتعتبر العقود الموقعة بينهم وبين المواطنين " عقود إذعان" لا يملك المواطن طالب الخدمة لها تبديلاً او تعديلا ً أو تحويلا.. وبدراسة متأنية مثلا لكيفية نهب المواطنين من قبل شركتى الكهرباء والمياه تبين أن هاتين الشركتين تتبعان سياسة تكاد تكون متشابهة الى حد التطابق فهم قاموا بالاتفاق مع المصانع الحربية لتصنيع وتركيب عدادات خاصة واستبدالها بالعدادات القديمة بمقابل او بدون مقابل ومن خصائص العداد الجديد انه ينقل نفسه لشريحة اعلى اوتوماتيكياً اذا ما قامت ربة المنزل مثلا بتشغيل الغسالة والمكنسة الكهربائية فى وقت واحد.. أى ان العداد يقترب من خصائص العداد التجارى!.. او تتساهل هذه الشركات مع قراء العدادات الذين يتكاسلون فى المرور على المنازل لتسجيل القراءة الصحيحة الواقعية لأن فى هذا التكاسل مصلحة كبرى لهذه الشركات إذ أنه يؤدى الى تراكم القراءات بالعدادات وبالتالى محاسبة الناس باعتبارهم مستهلكين لشرائح أعلى بثمن اعلى! ناهيك عن انقطاع الكهرباء والمياه لفترات متفاوتة وايضا فى كل المناطق بلا اسثناء حتى منطقة خلف المحافظة ذاتها بالاضافة لعدم وصول المياه للطوابق العليا..

صفر المونديال واستاد دمنهور الجديد

ماجد بعيص يقول أن اهدار المال العام يتجلى بوضوح للعيان فى استاد دمنهور الأوليمبى الجديد على طريق القاهرة – الأسكندرية الزراعى بجوار الكوبرى الدولى حيث مئات الأطنان من الأسمنت وحديد التسليح التى ذهبت هباء منثوراً بلا أدنى شعور بالمسئولية تجاه مقدرات وثروات هذا البلد وتضييعاً لأموال دافعى الضرائب فبعد حصولنا على صفر المونديال تم اهمال استكمال انشاءات الاستاد ليضاف ذلك الى كم الاهمال الذى يلف حياة المواطن البحراوى..!
عشرات السيارت التى اكلها الصدأ من الركنة فى ساحة مجمع مبارك بدمنهور
عشرات السيارات والموتوسيكلات والبلدوزرات وكل وسائل النقل من مختلف الانواع والمكتوب عليها- محافظة البحيرة- "مركونة " فى ذلة وانكسار حتى ينتهى عمرها الافتراضى على ما يبدو فى ساحة مجمع مبارك الثقافى بدمنهور تحت حر الصيف القائظ والرطوبة الليلية حتى بدأ الصدأ يفعل بها الأفاعيل وثقبت إطاراتها , هذه الثروة القومية تصرخ بصوت صامت: حرام.. كفاية اهدار.. أليس من الأولى توزيع هذه السيارات والموتوسيكلات على الشباب العاطل لتشغيلها والاسترزاق منها فى مقابل ايجار شهرى او يومى حتى ؟ أم أن الإهمال والإهدار والنسيان احق بثرواتنا من بنى الانسان

عندك حق ياايهاب

والله ما عارف لنوصل لايه بعد كده

موضوعك لخص حياه دمنهور

شكرا على الموضوع

سوال يا استاذ ايهاب يعني ارتفاع الاسعار ده موجود ف دمنهور بس ؟ اكيد لا مصر كلها ارتفاع اسعار تاني حاجه موضوع التثبيت و المحفظه و السلسله ده ما موجود ف مصر كلها انتا ليه قولت دمنهور بس ؟ و موضوع الايجار الجديد ده باردوه ع مصر كلها هو يا استاذ ايهاب فيه قانون ايجار دمنهوري و اجيار اسكندراني و كده ؟؟
اسمه قانون ع كل مصر يا باشا

و الخصخصه موجوده ف مصر كلها م شف دمنهور بس

و بالنسبه للاستاد اللي حصرتك مش تعرفه و ان الناس اللي حضرتك واخد رايهم مش يعرفوه ان الاستاد ده حينضم لجامعه البحيره حيكون تبع كليه تربيه رياضيه

و احب اني اقول حاجه دمنهور من احلي المدن اللي موجوده و لو انتا مش شايف كده كل الناس شايفه كده
انزل اسكندريه و لا القاهره حتلاقي زي دمنهور اماكن نضيفه و اماكن مش نضيفه
اتمني ان لما تحب تكتب حاجه ع دمنهور اكتب ع دمنهور زات نفسها حاجه مختلفه عن باقي المحافظات مش كاتبلي حاجه موجوده ف كل انحاء مصر و تقولي ده ف دمنهور بس

وشكرا ع الاطاله تقبل مروري

واضح يا استاذ عمرو ان حضرتك لم تقرأكويس
وان قرأت فلم تفهم شيئاَ
أولا الموضوع ده اتنشر فى معظم الجرائد الاقليمية وزى ما سيادتك شايف ده كلام الناس يعنى انا صحفى مجرد ناقل لمشاكل الناس وهمومها واتفضل شوف ردود الناس على الموضوع فى باقى المنتديات
واضح انك لخبطت نفسك وعملت مقارنة خاطئة تماما
أولا انا بأتكلم عن ارتفاع الايجار مش قانون الايجار وطبعا فرق كبير
وحتى لو اتكلمت على قانون الايجار الجديد ايه المشكلة لما أعرض مساوئ القانون فى دمنهور ؟ ويكون مطلب لتغييره.. اى مشكلة بيتعرض لها اى نائب من اى مدينة فى مجلس الشعب ويقدم طلبات احاطة واستجوابات لما القانون بيفشل وفعلا بيتم تعديل القوانين
وانا لما اتكلمت عن ارتفاع الاسعار عرضت لدمنهور لانها بلدى والاقربون أولى بالمعروف وزى ما سيادتك شايف عرضت بالامثلة ازاى بيتم التلاعب بالاسعار فى بعض المناطق والشركات كمان
انا مش فاهم سيادتك عايز ايه بالظبط نتكلم عن مشاكل الناس فى مصر كلها او دمنهور بس ايه المشكلة ..؟ دمنهور جزء من مصر
وبعدين يا باشا انا اتكلمت عن مشكلة حاضرة فى استاد دمنهور.. اهدار الاسمنت وتآكل حديد التسليح يعنى ممكن ميكونش صالح للانضمام لاى حتة تانية والبناء ممكن يكون آيل للسقوط ده من ناحية
من ناحية تانية ليه نحرم دمنهور من استاد اوليمبى حديث ويكون مجرد بناء تابع لجامعة البحيرة
أرجع وأقولك انضمام الاستاد يا باشا لجامعة البحيرة - ده لو بقى فيه جامعة من أصله بعد عمر طويل - هتكون ميزانية الاستاد من ميزانية الجامعة نفسها لكن لو كان الاستاد مستقل يتبع وزارة الشباب او المجلس الاعلى للرياضة هيكون له ميزانية مستقلة
وايه علاقة انضمامه من عدمها باهدار المال العام اللى الناس كلها شايفاه ؟!!
والخضخصة .. مش ده شئ بنعانى منه؟ ليه نتجاهله ؟
وطبعا حضرتك تجاهلت تعريفة التاكسى واهدار المال العام المتمثل فى السيارات الموجودة فى مجمع مبارك والشوارع المكسرة والقمامة اللى فى كل مكان وغيره
مرة تانية انت ليه مندفع اوى بدون مناسبة.. وحذفت مصدر الموضوع فى مدونتى؟
وطبعا انت اللى اعطتنى تقييم سئ
وانت بتقول كاتبلى
بس انا مش كاتب لحضرتك انا كاتب للمنتدى زى ما كتبت لكل المنتديات والمواقع داخل وخارج
البحيرة.. وكنت مفكر المنتدى ده كمان بيتعرض للمشاكل..
ولا انت عاوزنا نغمض عن المشاكل ونقول كله تمام
يا باشا
سيادتك ظلمتنى وظلمت الموضوع
وبأقولك ارجع تانى شوف رد فعل الناس على الموضوع سواء فى الجرايد او المنتديات التانية او حتى مدونتى
ولو مش عاجب حضرتك
اتفضل احذف وريح بالك
يمكن ترتاح

يا ايهاب ف الاول و الاخر ده مجرد رائئ انا مش حمسحه اولا لان ده رايك بس انا واحد بحب بلدي
و كمان يا باشا موضوع الايجار لو عندك فكره اسال ف اي حته ف مصر اسعار الايجارات كام و حتعرف ان دمنهور مش لوحدها كده
و موضوع الاستاد للاسف اللي حضرتك مش تعرفه ان جامعه البحيره حتتسلم سنه 2015 جاهزه و ده قرار صدر خلاص اكيد ممكن تسال و تعرف كده اما موضوع الاستاد احنا موجود عندنا استاد و استاد تربيه رياضيه القادم
و موضوع التاكسي ع فكره اكيد انتا لفيت و عارف ان تقريبا دمنهور اقل اسعار تاكسي تقريبا شوف اسكندريه و لا القاهره
و كمان المناطق اللي لسه مش اترصفت مش حقولك الا كلمه واحده اكيد انتا نزلت من فتره سنتين كده او تلاته و لقيت البلد كلها بايظه و مش مرصوفه دلوقتي تلت تربعها اترصف و بقي حلو جدا صح و لا لا و اكيد كل حاجه حتم براحه هما شاغلين مش قاعدين
و كمان يا سيدي انتا كاتب انك كنت كليتك ف القاهره اكيد روحت دار السلام و الحلميه و المناطق ديه ع ما اعتقد دمنهور احلي منها بكتير و فيها باردوه كتير مش مرصوف و متكسر
و ياباشا انا مش حزفت مصدر الموضوع ف المدونه بس ممكن اقولك لو هو رابط موقع تاني اي حد حيمسحه من الاداره بس انا مش مسحته و كمان يا باشا انا مش قصدي نقول كل حاجه تمام ف البلد تمام لما نقول الوحش بس مش نشوه صورتها صح و لا لا

تقبل مروري يا ايهاب

بصراحه يا استاذ ايهاب الموضوع ده
فيه مبالغه كبيره جدا
وانت بتعرض فيه مشكلات موجوده فى كل محافظات مصر مش فى دمنهور بس
من اول القمامه والبطاله والسرقه وكل ده
ازاى يعنى يعنى كل ده موجود فى دمنهور بس
اظن كلام غير منطقى بالمره
واظن من حق حضرتك محدش يمانعك انك تعرض المشكلات
بس ما تجيش حضرتك تعرض مشكلات عامه موجوده فى كل مكان وتخصصها لدمنهور
اه فيه مساوى كتير موجوده فى دمنهور وزى م حضرتك قولت استاد دمنهور
اه ديه مشكله لازم نتكلم فيها
وكمان حضرتك بتكلم عن مشكله الرصف
واظه ديه كانت مشكله سابقه
اظن ما فيش غير شوارع بسيطه دلوقت غير مرصوفه
والباقى مرصوف يبقى ما تجيش تعمم وتقولى مشكله رصف
وحضرتك برده عندك حق فى مشكله تعرفيه التاكسى فعلا دمنهور مش شغاله بيها
على الرغم مش هيا المحافظه الوحيده
ولا مشكله ارتفاع السعار اظن ديه موجوده عند الجميع
وكمان دمنهور حضرتك بيه بعض السلع بتباع اقل من محافظات اخرى
وتعالى حضرتك قارن بين دمنهور واسكندريه
واكيد المحافظه بتصرف على حسب خزانتها واكيد البلد
اتصرف عليها كتير فى الفتره الاخيره علشان الرصف والصرف الصحى
ودمنهور كانت فين وبقت فين اعتقد انها بقت احسن بكتير
واسف على الاطاله وبشكر حضرتك على الموضوع