تم ترقية المراقب أمير بكلمتى والمراقبة ملكة الاحزان الى رتبة نائب مدير وذلك للأرتقاء بمستوى وحالة المنتدى

*آخر البنات المحترميــن *

دي قصه جامده جدا وعجبتني أوووووي ويارب تعجبكم
بس حكتبها على حلقات
بس هي طويلة شوية بس جامدة آخر حاجة بجد
أنا حبتدى بالحلقة الاولى ولو عجبتكم قولوا لى عشان أكملها
و إن شاء حنزل كل يوم حلقة .. إن شاء الله الاقي تفاعل منكم
ـــــــــــــــــــــــ

المكان :
كلية تجارة بأي جامعة ف أي مكان ف مصر
الوقت : أول يوم ف الدراسة

الشخصيات:
أحمد إمام : "سقيط كبير" شاب في الثالثة والعشرين ولازال في السنة الثالثة بالكلية.
منى ممدوح : فتاة في الثامنة عشرمدللة والديها صغيرتهم بعد شابين يكبرانها بسنوات، في أول سنة لها بالجامعة, فتاة جميلة محجبة.
كريم : صديق أحمد بالسنة الرابعة وهو طبعا أصغر من أحمد.
شيرين : صديقة كريم وأحمد ,بالسنة الثالثة , قريبة لــ منى من بعيد.
سارة: صديقة منى من الكلية فتاة محبوبة ومؤدبة

ميرنا : صديقة منى الاخرى و هى ايضا فتاة جميلة و محبوبة
***************************

الحلقه الأولى

حديث يدور بين شابين يدخنان في الكافيتيريا في الكلية وهو مكان يكشف بقية ساحة الكلية
أحمد وهو يلتفت بجسده وعينيه خلف فتاة تسير أمامه نافثا دخان سيجارته
أحمد: الدفعة الجديدة شكلها جامد مووووووت.
كريم:
ايوة يابني مش الغفر الي كانوا على أيام دفعتنا, ولا صحيح إنت استقبلت
دفعتنا واللي قبلها واللي بعدها ,وياتري بقي إنت ناوي تنجح السنة دى ولا
زي كل سنة.
احمد: ايه السيرة الغم دي , النهاردة أول يوم , خليك خفيف كده عشان أحبك.
كريم: يييييييه اهي شيرين وصلت حخلع أنا بقي عشان دي جايه كمان ومعاها واحدة صاحبتها.
كاد أحمد ان "يخلع" مع كريم ولكنه رأي ان الفتاة التي مع شيرين من الدفعة
الجديدة , ورأي أن من واجبه كأقدم واحد بالكلية أن يستقبل الدفعة الجديدة
التي طبعا كانت حلوة ورقيقة.
*********************
منى : أنا خايفة يا شيري اني ميبقاليش اصحاب في الكلية.
شيرين: أهي دي بقي آخر حاجة ممكن تقلقك في مكان زي ده , دا احنا هنا بنقول حنودي الاصحاب فين .
منى : لا ياستي بقولك ايه انا ماليش في الشلل , أنا مبحبش قعدة البنات مع الصبيان , أنا اخواتي قالولي......
شيرين: ياادي إخواتك الي عاملينلك وش في دماغك , يا بنتي هنا عادي , الدنيا كلها أصحاب في بعض , إنتي مش كان ليكي أصحاب صبيان في المدرسة.
مني:
ايوة , بس كلهم اصحابنا وجيراننا من زمان ومفيش منهم خوف لأنهم كانو
مصاحبين صاحباتي, وبعدين أنا مكنتش برضه معاهم أوي انا مبحبش الجو ده.
شيرين بصوت خافت: أنا قلت برضه انتي هتتعبيني.
ثم بصوت عالي : إيه ده كريم وايمو أهم .......هااااااي.
مني تصيح وهي تحاول اللحاق بشيرين التي توجهت نحو الشابين : إنتي رايحة فين؟ مش كنا هنجيب الجدول بتاعي؟

اقتربت الفتاتان من أحمد لأن كريم كان قد غادر , عدل أحمد من هندامه كما يفعل كلما قابل وجه جديد

شيرين : ايمووو انت فين ياراجل .
رد عليها برتابة: في الدنيا هكون فين يعني ؟
شيرين :إيه الغلاسة دي وبعدين كريم ماله كده جري زي الي عليه فلوس لحد .
أحمد: أصله افتكر واحد صاحبه كان مستنيه .
شيرين : آه.
أحمد بتسبيل : مش تعرفينا .
شيرين : لا مش هعرفك ,مش سكتك خالص على فكرة .
شعرت منى بالحرج من الكلام الذي يدور وحاولت ان ترد بأي شيء فصمتت
أخرجت شيرين تليفونها المحمول وطلبت رقماً :
شيرين: أيوه يا واطي ..... جريت ليه أول ما شفتني ........يا راجل ...
ومدت برجليها بعيدا قليلا عن أحمد و منى
أحمد: إنتي بقي سنة اولي ؟
أ* (أحمد في رأسه) اكيد والا كنت شفتك .
منى بخجل :آه
م* (منى في رأسها) يوووه يا شيرين خلصي بقي.
أحمد: معاكي الجدول ولا أجيبهولك .
مني وقد ارتبكت : لا ... ماهي شيرين هتيجي معايا... يعني ..هنشوفه .
أحمد: طب إستني خليكي هنا.
وإنطلق كالصاروخ مغادرا إياها ,في نفس الوقت الذي انهت فيه شيرين المكالمة
شيرين: الله؟ فين الواطي التاني؟
منى : معرفش , قالي استني وجري , تعالي نمشي.
شيرين: هو قال راجع ولا قال إيه؟
منى: مقالش حاجة يلا نمشي بقي.
شيرين : لا غستني أهو , ماله بيجري كده ليه ؟
وصل أحمد لاهثاً ومد يده بورقة الى منى
أحمد: إتفضلي يا ستي , جدول سنة اولي.
نزعت شيرين الورقة من يده وهي تجذب يد منى بعيدا
شيرين: متشكرين يا سيدي , بس ريح نفسك , قلتلك مش سكتك .
إعترض طريقهم قبل إن تغادرا
أحمد : إيه إيه , رايحين فين ؟
شيرين : إنت مش جبت الجدول , يلا باي بقي البنت جديدة وهلففها في الكلية.
تجاوزتاه وهو يتابعهما ببصره قائلا
أحمد : آجي معاكو.
شيرين تهتف وهي تجر منى ورائها جراً
شيرين : لا شكراً.
ظل أحمد يتابعهما ببصرة وهو يقول في نفسه
أ* ودي مين دي يعني اللي شيرين خايفة عليها أوي كده؟؟؟ هتكون تفرق إيه عن البنات التانية ؟؟؟
منى وهي تكاد تركض خلف شيرين , التي إنطلقت وكأن كلب يجري خلفها
م* ودا مين دا يعني اللي شيرين خايفه عليا منه أوي كده , هي مش كانت بتقول لي الناس هنا كلهم أصحاب عادي؟؟؟
ــــــــــــــــــــــــــــــــــــــــــــــــــــــــــــــــــــــ
إستنونــــا بقى ف الحلقة الجايــــة
متنسوش تقلوا لى رأيكم إيه عشان أعرف بس حكملها ولا إيه النظام

جامده جدا
واكيد كمل حبيبى
نتمنى المزيد

واضح انها قصة جميلة
ننتظر المزيد

ميرسي المرور والمتابعة Smile

حلوه القصه يا ايتها الفتاه المستحيله !!!!!!!!!!!!!!!!!!

بس باين من مزاجك انك لسه معرفتيش رجال

حلوة الفتاة المستحيلة دي !! بس جبتها منين دي !؟؟؟

عامة نورت التوبيكـ

الحلقه التانيه

لم ير احمد الفتاة مرة اخري وطبعا نسي فالدفعة مليئة بالوجوه الجديدة التي
كان مشغولا بالتعرف عليها, فهو من أثارات كلية التجارة ,مضى حوالي الاسبوع
الي ان لمحها تسير بين فتاتين تتوجهان قرب الكافيتيريا وقرب مكانه العتيد
بجانبها.
******************
لم تشغل منى بالها بما حدث هذا اليوم
كثيرا ولكنها احتفظت بالجدول ,ورأت احمد عدة مرات بالكلية فهو لا ينفك
يدور بالكلية يسلم علي اصدقائة من كل السنوات الدراسية , وكانت تشعر
بالفضول كلما رأته خاصة والسلوك الغريب الذي انتاب شيرين حين حاول التعرف
عليها .
هاهو يقف بمكانه المعهود , لا ارجوكم دعونا لا نمر من جانبه ,
ييييه لقد رأني , تري ماذا سيفعل ؟, هل سيشيح بوجهه بعيد , يا ربي انه
يبتسم.
******************
ابتسم احمد فيما اقتربت الفتيات منه وهن
مستغرقات في الحديث الا منى التي تعلقت عيناها بعينيه , فابتسم لها , اطلت
من شفتيها ابتسامة مترددة ,فانتبهت صديقتها ان منى لا تسمعها فالتفتت لتري
لمن تبتسم فقالت :
سارة: ايمو ازيك؟
احمد وهو لا يذكر اسم الفتاة التي تسلم عليه ولكن لم يبد عليه شيئاً
احمد: الحمد لله , ازيك انتي ؟
سارة:كويسة .
نظر الي منى مباشرة في عينيها وقال :
احمد: ازيك؟.
تمتمت مني بشيء في خفوت معناه الحمد لله فقالت سارة
سارة: ايه دا انتو تعرفة بعض؟
قالت منى :اه
بينما قال احمد :لا
فتورد وجهها احمراراً فسارع احمد يقول
احمد : قصدي اتعرفنا علي بعض بس منعرفش اسامي بعض
سارة: بسيطة ...احمد امام .....منى ممدوح.
مد احمد يده *ايوه كده تمام
احمد: فرصة سعيدة.
مدت منى يدها بتردد* انا مبحبش الي بيسلمو بالايد
منى : شكراً.
ضغط احمد كفه برفق وفي سرعة على يدها اصابعها التي بالكاد لامست يده وتركها سريعا كأن لم يضغط مما جعل وجهها يحمر قليلاً
احمد* اول مرة بنت تحمر عشان سلمت عليا
منى *ايه الولد دا
*****************
بعد
هذا اليوم بأيام رأي احمد منها , لم يرها صدفة , بل كان ينتظرها المدرج ,
وقد قارب موعد انتهاء محاضرتها , وقد لا حظ انها من هواة حضور المحاضرات,
وهذا شيء غريب على غير الصف الاول في الكلية ,لم ينتظر كثيرا كان متوقفا
مع "شلة" من اصحابه في السنة الثانية بالكلية اذ لا حظ نزول الصف وبينهم
منى, لم يتحرك نحوها , بل توقف في مكان يراه فيه النازلين من المدرج ,
واثقا من انها ستراه فيه.
رأت منى احمد , اول ما نزلت من المدرج وجدته امامها واقفا يضحك ويهزر بصوت عال مع اصدقائه , تعلقت عيناها به بينما قالت سارة
سارة: الواد دا زي العسل انا يوم ماعرفته مبطلتش ضحك.
قالت فتاة اخري معهما
ميرنا: مين؟ ايمو؟ , دا زي القمر انا كنت هموت عليه في اول اسبوع بس قالولي مالوش في السن الصغير.
سارة: انتي متعرفيش اصله كبير عننا اصلا دا بقالة ميت سنة بيسقط , قولي يمكن دلوقتى عنده 22 ,23 سنة.
ميرنا: تعالي تعالي نسلم عليه.
وتجاوزا منى متوجهتان صوب احمد , وهي كالمصدومة خلفهما , الي اين هما ذاهبتان , لا , سأنصرف انا.
التفتت اليها سارة ملاحظة تجمدها في مكانها
سارة: فيه ايه يا بنتي متنحة ليه ؟ اتحركي.
منى : بصي يا سارة روحو انتو وانا هطلب الاوردر في الكافيتريا وانت تبقو تحصلوني اوكي.
سارة : طيب مش هنتأخر.
وتوجهتا نحوه وسارة تسمع صوتهما :
ايمو , ازيك .
*انا ماليش دعوة عايزين يقفو معاه هما حرين انا ماليش في الناس الي بتسقط.
وقف
احمد مترقبا منى والحديث الذي يدور بين الفتيات من بعيد , يبدو انه عليه ,
فتعمد اعلاء صوته بالضحك والهزار , جيد ,ها هن الفتيات يقتربن , ما هذا ؟
لماذا تسمرت منى؟ مالذي يحدث؟,لا لا لا الي اين هي ذاهبة؟
يا الله , لقد ذهبت ,غلا الدم في عروقه , لقد دنت منه فتاتين لا يذكر اسمهما حتى , ما هذا الحظ؟.
*ماشي يا منى بتحلقيلي انا هوريكي , مش انا الي يتعمل معاه كدة.

ههههههههههههههههههه

ما هو الفتاه المستحيله او الفتاه الخفيه او الغير مرئيه بمعني واحد
ولا انتي تحبي اقولك ايه؟

انا بدات اتشوق علشان اعرف ايه اللي هيحصل

بس القصه دي كانت هتبقي روعه لو بالصور

خصوصا صوره مني

الحلقه التالتة

لم يغمض لأحمد جفن
منذ ذلك اليوم, اولا هو لم يحاول اغواء فتاة من قبل , على الاقل منذ بضعة
سنوات ,فهو "سمعته تسبقه" في كل مكان, ومنذ فترة لم يعييه الحصول على بنت
, آلمه غروره , مع ان في الحقيقة لم يحدث امر يحرجه او يغضبه لان شيئا لم
يحدث اصلا على الاطلاق , لكنه هو الوحيد الذي يعلم نيته ومراده , وقد جرح
الامر كرامته امام نفسه فأقسم ان يصلح مظهره امام نفسه على الاقل.
رأها , كانت جالسة وحدها , فرصة ذهبية , اقترب بخفة وجلس بجانبها على الكرسي , رفعت عينيها عن تليفونها المحمول الذي كانت تعبث به.
******************
جلست منى تنتظر صديقاتها علي مقعد بالكلية, لم تكن الكلية مزدحمة يومها ولا كان عندها محاضرات اصلاً,
شعرت بشخص يجلس على المقعد غير بعيد منها , فرفعت عينيها عن تليفونها فاذا به أحمد , ارتجفت , مالذي اتي به , اقتضبت ابتسامة سريعة علي فمها .
******************
أحمد: منى, ازيك؟
منى: الحمد لله.
أحمد: قاعدة لوحدك ليه ؟
منى: عادي.
م* قاعد انت جمبي ليه؟
أ* انتي هتردي كل سؤال بالعافية.
أحمد : امال اصحابك فين؟
منى : لسه مجوش.
أحمد: طب ما تيجي تقعدي معانا لحد ما ييجيو.
منى : لا معلش هستناهم هنا عشان يلاقوني.
أ* ايه البت الرخمة دي؟
أحمد: طب هقعد انا معاكي لغاية ماييجو.
م* ييييه ياريتني قلت له ماشي.
منى: مبتشوفش شيري .
أحمد وقد انبسطت اساريره لفتحهها موضوع للتحاور
أحمد: لا والله من ساعة ما شفتها معاكي وهي مطنشاني , هي قريبتك؟
منى : اه, من بعيد , هي طيبة اوي .
أحمد : فعلاً , هي بنت جدعة .
ساد صمت محرج قليلاً
أ* فكر ياواد يا ايمو متقعدش ساكت كده .
م* ايه يا منى ؟انتي خرسة ليه؟ عمرك ماكنتي رخمة كده , فكي شوية.
منى: انا شفتها النهاردة .
أحمد : هي مين دي؟
منى : شيري .
أحمد : اه فين؟
منى : لمحتها عند البوابة الصبح.
أحمد التمعت عيناه , وقد اضائت فكرة برأسه
أحمد: لما تشوفيها تاني قوليلها اني عايزها ضروري , ولا اقولك رني عليا وانا اجي اقفشها.
منى وقد فهمت مقصده وحاولت التهرب منه
منى : اه حاضر, ان شاء الله
أ* ايه ده , هي تصيع عليا.
فقال مباشرة
أحمد: انتي معاكي نمرتي.
شعرت منى
انه اسقط في يدها فهزت رأسها نفياً ,فبكل بساطة مقصودة امسك تليفونها من
بين يديها وسجل نمرته ورن على هاتفه وقال لها في "استعباط" تام
أحمد: اول ماتشوفيها رنيلي , انا همشي دلوقتي ماشي .
وانصرف عنها وهي تكاد تغلى غضباً مما فعل
أ* قشطة كدة.
م* ايه الواد البجح دا

.

الحلقه الرابعة

كريم: مالك يا بني, سيب الموبايل مش هتتصل.
احمد: هي مين دي الي مش هتتصل.
كريم: ها هاي الي انت مستنيها.
احمد: انا مش مستني حد يتصل ,وبعدين مين قال انها مش هتتصل ؟
كريم : اهه يعني فيه حد هيتصل.
احمد: وانت مالك اصلا ياغلس .

*****************
منى : شيري ....شيري ..
شيرين: مينوووو .
اقبلت شيرين وقبلت منى على وجنتيها
شيرين: انتي فين يا كلبة.
منى: انتي الي مبتسأليش .
وبعد ان قاربتا على انهاء حديثهما قالت منى
منى: اه على فكرة , احمد امام عايزك ضروري .
شيرين: ودا عايز ايه دا كمان ضروري كده .

*****************
شيرين : انت ياواد انت.
احمد: بنت يا شيرين , ازيك انتي فين؟
شيرين: كنت مسافرة , ايه اخبارك؟ عايزني في ايه؟
احمد : عايزك ايه؟
شيرين : انت مش قلت لمنى تبلغني انك عايزني ضروري .
احمد: لا انا .......أهههه....لا ولا تحطي في دماغك.
شيرين : ايمو .... جري ايه , انت هتعط من ورايا؟
احمد : ههه.. لا يا بنتي مفيش حاجة.
شيرين: احمد يا امام انا بتكلم بجد ابعد عن منى دي بنت ناس.
احمد: منى ايه وعيال ايه يا بنتي انتي , وبعدين ايه يعني بنت ناس هو انا الي كنت اعرفهم ولاد ايه.
شيرين: لا دي مؤدبة ومش حملك لو فيه حاجه في دماغك ياريت تطلعها لو سمحت.
احمد: يا بت بجد مفيش حاجة.
شيرين : اصل انا مش عرفاك , ايه مالك؟ ايه الي هيموتك عليها كده , انها مؤدبة , وحياة ابوك تخليهالي كده دي امانة.
احمد: يعني ما هو انا لو مستلمتهاش هيستلمها غيري , هي داخلة كلية شرعي ؟؟
شيرين: ايمو ... عشان متخسرنيش , شوفلك حدوتة تانية اليومين دول.
احمد: انا اقدر ارفض لك طلب ياقمر.

******************
سارة : مين دا يا بنتي الي اداكي نمرته انتي بتهزري, دا واد تنك جدا وما افتكرش انه هيديكي رقمه.
منى: والله العظيم اخد موبايلي من ايدي كده بالظبط وكتب نمرته , اتصلك بيه يعني عشان تتأكدي.
سارة: اكيد عشان كان عايز شيرين في حاجة , وعشان كده بس عمل كده.
منى: يا بنتي كان باين اوي انها حجة, انا مش هبلة.
سارة : طب وانتي عملتي ايه بالنمرة؟
منى: مسحتها اول ما مشي .
سارة: يخرب عقلك انتي اتجننتي .
منى : يعني كنتي عايزاني اعمل ايه يعني؟
سارة : معرفش بس مكنتيش تعملي كده .
سكتت منى قليلا ثم قالت
منى : بس انا حفظت النمرة قبل ما امسحها
*****************
جبت جون ياواد يا ايمو SugarwareZ

قصه جمييييييييييله بجد

بس حركه جريئه انه ياخد الموبيل من ايدها ويسجل النمره

بس يا تري هيا حفظت النمره ليييييييييييييييييييه ؟

معاكي انفلوازا جييييرل

حبقى اسألهالك Laugh 1

ميرســــي ع المتابعة والــرد .. منوووووووور

ميرسي ليكي علي القصه الجميله المسليه الاكثر من رائعه

ومستني باقي الحلقات وعلي فكره انا اسمي احمد ههههههههههه

قصة رائعة
تسجيل متابعة

الف شكرررر

الحلقه الخامسة

ما زادت تحذيرات شيرين احمد الا فضولا, ومازاده الفضول الا رغبة في التقرب من منى , ورغم وعده شيرين انه سيترك منى في حالها , الا انه قرر ان ينتقل بما بينهما الي قليل من الخصوصية , فقرر الاتصال بها.
*****************
تسمرت منى
امام تليفونها والهاتف يرن ,لقد تعرفت على الرقم جيدا, فقد حفظته رغم
انفها ,ماذا عساها تفعل؟؟, ترددت قليلا قبل ان تصمت صوت الهاتف لتتركه
وتبتعد.
*****************
لم ترد , ماذا افعل ؟, لا لليأس سأتصل مرة أخري ,مالذي سأخسره ؟ , ليس هناك شيء غير عادي , اني اتصل بها لاسأل عليها لا غير .
*****************
لا ....غير معقول انه مصر, حسناً ...سأرد ,مالذي سأخسره؟ ,ليس هناك شيء غير عادي , سأرد لأعرف ماذا يريد.
*****************
منى بصوت مرتعش
منى: ....الو.
احمد: منى ؟
منى : ايوة مين معايا؟
م* انا هعمل نفسي مش عارفة
احمد: انا احمد امام .
أ* ايه الكسوف دا ياريتني ما اتصلت
منى: اه ازيك ؟ اخبارك ايه؟
احمد: الحمد لله انتي ازيك؟
منى : تمام , ايه فيه حاجة؟
قال وقد بدا عليه شيء من نفاذ الصبر والغيظ الي شعر به
احمد: يعني هو فيه حد في الدنيا بيقول الو فيه حاجة؟
منى : ههههه لا والله عادي انا بس قلت فيه حاجة.
م* خفي يا مينو شوية على الولد دا شكله ظريف
احمد : لا يا ستي انا مش متصل عشان حاجة , انا متصل اسأل عليكي.
منى: ...............
م* اوباااا
أ* ايه يابو حميد متسكتش حور
احمد: مش انا انهاردة شفت ميرنا صاحبتك
منى: اه .... بجد؟
احمد: انتو هتطلعو الرحلة؟.
منى : رحلة ايه؟
احمد: العين السخنة , انتي مش طالعة , دي ميرنا قالتلي النهاردة انكو طالعين.
وطبعا كان هو الذي ارسل كريم ليقنع ميرنا واصحابها واستغل الامر
منى : مش عارفة ؟ هسأل ماما .
أ* متزنش خليها تيجي منها.
احمد: طب لوهتطلعي ابقي بلغيني عشان اظبتكو قبل العدد ما يبقي كومبليت .
منى: اوكاي.
احمد : ماشي يا موني , عايزة حاجة؟
م* اههه احنا فينا من موني
منى : لا شكراً , سلام .
احمد: ايه دا انتي عايزة تقفلي كده ليه ؟
منى : ...... مفيش , عادي.
احمد: هو كل حاجة عادي, ما علينا هبقي اكلمك تاني, باي باي.
واغلق السماعة وكلمة " هكلمك تاني" ترن في اذنها.

هههههههههههههههههههههههههه

تصدقي احمد ده بيفكرني بواحد صاحبي

طب مني هتطلع الرحله ولا لاء ؟؟؟؟؟؟

يا راااااجل !! سبحان الله

إستنى الحلقة الجاية وإنت تعرف طلعت ولا لأ

الحلقه السادسة

ترددت منى منذ أن حادثها أحمد في موضوع ذهاب الرحلة , ولكن , لم تكن تريد ان تبدو متلهفة ,
فآثرت الانتظار فترة حتى لا يبدو عليها ,ولكنها اخبرت سارة الامر.

سارة: وانتي بقي مالك من ساعتها .
منى : شايفاني بقي بتنطط من الفرحة ولا مالي يعني.
سارة
: لا , شايفاكي هتطقي كأنه قالك تعالي نتجوز عرفي , دا واحد كل الي عمله
انه اتصل بواحده يعرفها من بعيد بيستهبل, عايز يلم عدد للرحلة الي هو
مطلعها , مالك واخدة الموضوع كأنه شخصي اوي؟ , وكأنه مطلع الرحلة مخصوص
علشانك.
منى : انتي ايه؟ , بلدوزر محدش يعرف يتكلم معاكي ابدا.
سارة:
انا عشان بقولك الحق ابقي بلدوزر ,بدل ما تحمدي ربنا ان ليكي صاحبة خايفة
على مصلحتك, طيب يا ستي انتي حرة, والرحلة بتاعتك دي انا مش طلعاها.
منى : انتي بتهرجي , لا طبعا هتطلعي.
سارة: طب والله منا طالعة وخلي ست ميرنا تنفعك.
**********************

قبل الرحلة بيوم

كريم: يا ابني كلمها اسألها هتطلع ولا لأ.
احمد: قلتلك ميت مرة مش هتصل , مينفعش ,هو انا هتحايل عليها؟, وبعدين احنا مفيش بينا كلام اصلا الا من بعيد لبعيد.
كريم: امال ايه بقي نرفزتك دي عليا من ساعة ما عرفنا من ميرنا ان احتمال هي بس الي تطلع؟
احمد: انا مش متنيل متنرفز وبعدين ايه يعني ما عنها ما طلعت معادش الا عيلة كمان الي هتوجع لي دماغي.

وانصرف عن كريم غاضبا.
كريم يتمتم لنفسه

كريم: لا ابدا ,لا متنيل متنرفز ولا كان هيضربني ولا حاجة.
*********************
بعد
قرار سارة انها لن تذهب الرحلة , اضطرت منى للامتثال , بعد ان اقنعتها بأن
من الافضل الا تنجرف لمشاعرها التي ستؤذيها ,وانها يجب ان تعود لعقلها
وبالفعل قررت منى ان تنسى احمد , وتقتنع بأنه لم يفعل شيئاً اصلا ليعلقها
به , وأن الأمر كله عادي , وما تتوهمه هو من نسج خيالها فقط , وأن ما زرعه
أخوتها الكبار فيها من الخوف من اصدقائها الشباب ماهو الا اوهام وتعنت من
جانبهم , وان الحياة في الكلية غير ما يفكرون به تماما, أوكأنهم لم يدخلو
كليات من قبل؟ , وانها لم تعد طفلة , انها فتاة كبيرة وتعرف حدودها جيدا.

*********************
مر
يوم الرحلة على احمد كسابق الرحلات, جميل ظريف , بل والادهي انه مليء
بالوجوه الجديدة , ومر عليه اليوم وقد نسي غضبه, بل نسي وجود منى اصلا.
*********************
صحيح
ان منى قررت الا تفكر في احمد , الا ان عقلها الباطن كان ينتظر منه
مكالمة يستفقدها في الرحلة, الم يتصل بها مخصوص ليدعوها , وتعب عقلها
الباطن من التفكير طوال اليوم ,مما اوصلها لحالة من الانكار الشديد لما
يحدث لها.

م* انتي عبيطة؟, احمد مين دا الي بيفكر فيكي؟, اسمعي كلام
سارة , مفيش حاجة من اللي في دماغك اصلا, وبعدين مش انتي مش بتاعة الكلام
ده, بتفكري فيه ليه بقي دلوقتي ؟؟؟ّّّّّ!!
وقررت غلق الموضوع والالتفات لدراستها فقط.
********************
بعد
هذا اليوم , عاد احمد و منى كل لحياته , صحيح ان منى تراه كثيرا في الكلية ,
وكيف لا ؟ وهو مثل بخارالماء , الا انها قست نفسها واعانتها سارة على ذلك ,
اما احمد فكاد ينسي منى لولا انه كان يلمحها في بعض الايام , اما داخلة
الكلية , او خارجة , او عند الكافيتيريا , لكنه لم يشغل باله ان يتكلم معها.

أ*
والله انا عرضت عليها وهي اللي رفضت , بتتنك على ايه انا مش فاهم, خلى الادب
ينفعها, انا عمري ما اتحايلت على بنت , وبعدين البنات اكتر من الهم على
القلب

اممممممممممممممممممممممم

هو فعلا البنات اكتر من الهم علي القلب بس اكيد فيه حد زي العسل علي القلب

الحلقه دي غم اوي!!!!!!!!

بس انا متوقع ان مني هي اللي هتروح تكلم احمد تاني

عارف هتقولي : استني لما تعرف الحلقه الجايه

تسجيل متابعة
الحلقة فعلا غم شوية
عايزين نعرف نهاية القصة دية
فكرة بجد رائعة مثلك

ميرسي بجد يا جماعة ع المرور والمتابعــة ..

والف شكر ليكي يا ملكــة الأروع ردكـ يا قمر

الحلقه السابعه

شيرين: يا بنتي انتي بتدخلى الامتحان تكتبي الي تعرفيه سواء جالك او مجالكيش, المهم تملي ورقة الاجابة.
منى: هو انا هستنا لما ادخل الامتحان؟, انا مش فاهمة حاجة اصلا , انا عايزة
اخد درس , وعايزة الحق دا معادش الا شهرين على الامتحانات, وخالد زميلي
قالي ممكن يشرحلي , بس مش عارفة اعمل ايه.
شيرين: ايه دا ماحنا اتنطقنا اهه وبقي لنا اصحاب ولاد .
منى: لو سمحتى يا شيري ,دا ولد محترم جدا وبعدين دا دحيح الدفعة, وانتي عارفة كويس اني ماليش في الحورات دي.
شيرين :طب بالراحة عليا شوية, ربنا يكملك بعقلك يا ستي ويبعد عنك الشيطان ......ييييه اهو جه.
منى: هو مين دا؟
شيرين: الشيطان.
التفتت منى لتجد نفسها وجها لوجه امام احمد, نظر الى منى وقال محادثا شيرين
احمد: شيطان ايه؟
أ* ياه انتي لسه بتحمري , بس والله ليكي وحشة
منى:....................
م*حرام عليكي يا شيري بقي دا شيطان
قالت شيرين
شيرين: سيبك انت, كنت رايح على فين كده؟
احمد : كنت بدور على كيمو مشفتيهوش؟
شيرين : لا مشفتوش, الا صحيح يا ايمو , متعرفش حد بيدي دروس سنة اولي .
نظر لمنى بنظرة خاوية وقال
احمد: اعرف واحد صاحبي كان معانا, هو دلوقتي معيد, انتي عايزة تاخدي درس؟
منى بصوت خفيض
منى: اه, انا كنت بسأل شيرين اعمل ايه, بس انا ممكن واحد زميلي يشرحلي.
أ* واحد زميلك , هو انتي لحقتي ,ماكنتي عاقلة, قال واحد زميلي قال
احمد: لا لا لا, متخليش حد يلخبطلك دماغك , انا هظبطلك عند صاحبي دا وهبقي اكلمك اقولك, تمام؟
م* مابلاش انت, انا ما صدقت نسيتك
منى : ماشي ان شاء الله.
احمد: يلا , عايزين حاجة؟
شيرين: وهنعوز منك انت ايه؟
احمد: ماشي يا غلباوية , سلام.
وبعد ان مشي التفتت شيرين لمنى واضعة كفيها في وسطها

شيرين: وايه هكلمك اقولك دي ان شاء الله, انتو بتكلمو بعض؟
منى: لا والله العظيم ابدا , هو مكلمنيش الا مرة يقولي على الرحلة وبس وعمرنا متكلمنا حتى في الكلية بعدها.
شيرين: وبس؟
منى: انا حلفت , انتي مش مصدقاني؟
شيرين: مصدقاكي يا ستي......., والله انا نفسي انصحك بس خايفة تفهميني غلط.
منى: لا قولي يا شيري براحتك.
شيرين: اصل احمد دا انا اعرفه من اول ما حطيت رجلي في الكلية, كان لسه بيعيد
تانية ,كان واد بايظ وكده , بصراحة عجبني اوي لانه مع كل دا كان جدع ,
وحصلت توقيعة كده من واحدة صاحبتي, وصلتله اني معجبة , كنا ساعتها مش
اصحاب اوي , فبدأ هو يرسم عليا وبتاع , بس شوية كده , عرفت حكاية التوقيعة
وقلتله اني مش في دماغي حاجة , وبقينا اصحاب من ساعتها , بس هو مبيبطلش
رمرمة , انا مش قلقانه منه هو , انا خايفة عليكي انتي , ممكن تحطي انتي في
دماغك حاجة وهو مش هنا اصلا.......
منى تقاطعها بشدة
منى: انا مفيش في دماغي حاجة.
شيرين: اسمعيني بس للاخر, انتي لسة مش في دماغك حاجة, بس انتي خام ع الاخر , يعني
مصيبة ,ممكن من ادبك تروحي في داهية , ومتفتكريش انا مش دريانه بيكي
,دانتي بتحمري لما بيكلمك.
منى: هو الادب بقي عيب الايام دي؟
شيرين: لا , مبقاش عيب ولا حاجة, بس عشان تتعاملي مع الناس لازم تكوني مصحصحة,
يعني عندك سارة صاحبتك مثلا, انا شايفة انها مبقالهاش شهر ونص في الكلية
وبقت اشهر من احمد نفسه, ومع ذلك ماحدش يقدر يتعدي حدوده معاها, ولا يقول
عليها كلمة , وكل الناس اصحابها , اهي هي دي الصحوبية الي كنت بقولك
عليها, يبقي كل الناس اصحابك , بس انتي مش ملك حد.

منى: انتي بتقوليلي الكلام دا ليه.
شيرين: عشان انا بنت وعارفة البنات كلها بتبقي عايزة تحب وتتحب وانا نفسي حبيت
واتحبيت واديكي شفتي الي حصلي ومن ساعتها الحمد لله , عرفت ان الطريق
السليم مفيش احسن منو, وانا تعبت جامد بعد اسامة , واحدة غيري كانت دورت
على واحد تاني على طول عشان تملا الفراغ الي سابه, ودا الي بيحصل على طول
البنت اول مابتسيب الولد بتبقي عاملة زي المدمنة مبتبطلش ولاد , وهاتيلي
اسم بنت سابت ولد وما ارتبطتش بعده , انا الحمد لله لولا انهم لحقوني
بمحمود ودخل من الباب مكناش هنتخطب بعد اسبوعين , وانا شفت , شفت انتي
بتبصي لاحمد ازاي , انا اكبر منك بسنتين صحيح, بس انا شفت كتير , وانتي بقي
ودماغك , خدي بالك من نفسك عشان ماحدش هياخد باله منها الا انتي , والكلام
دا مش على احمد بس , دا على اي ولد تاني يحاول يدخلك من الشباك.

صمتت شيرين ونظرت لمنى التي كانت مدهوشة طوال المحاضرة التي قالتها شيرين ,
شعرت منى بان كل كلمة قالتها شيرين كانت صواب ,حتى ان عينيها امتلأت بالدموع.

شيرين: ايه يا بنت يا هابلة انتي هتعيطي؟
ومدت ذراعها واحتضنت منى وقالت
شيرين: يا عبيطة ,انا قصدي افهمك.
منى من بين دموعها
منى: انا فهمت والله فهمت.

هي قلبت بغم ليه كده ولا علشان النتيجه قربت انا شايف كل حاجه غم

بس والله مني دي زي العسل انا بدات احبها

آآآآآه صحيح ما انت إسمكـ أحمد برضـــه مش كده !!

عامة هنشوف هيحصــل إيه .. إستنى الحلقات الجايــة Jaban 1

تم ترقية المراقب أمير بكلمتى والمراقبة ملكة الاحزان الى رتبة نائب مدير وذلك للأرتقاء بمستوى وحالة المنتدى

اقتراحك يهمنا

آخر البنـــات المحترميــــــــــــــن