ما هو ده العادي((مذكرات مواطن مطحون))

السلام عليكوم ورحمه الله وبركاته
طبعا العنوان غريب ومش لطيف بس عادي
ماجاتش علي العنوان مش مصدق تعالي وانت تعرف

بص خليك معايا هانقضي يوم مع بعض من اول ماتصحي الصبح وتخرج من البيت بتقول يا فتاح ياعليم يارزاق ياكريم

هب
تضرب عينك يمين كده شويه تلاقي طابور العيش (لالا اسف طوابير العيش) وكل
من هب ودب بيتظاهر بقدره البدنيه والجسمانيه لكي يحصل علي العيش وانت واقف
عادي

كل اللي عليك تضرب كف علي كف وتقول هاعمل ايه يعني اولع فيهم ماهو ده العادي

تروح تركب مواصلاتك بسلامه نيه تلاقي امم واقفه مستنيه( حضرات الساده السواقين ) لحد مايحن عليك سواق وعلي اللي واقفين وياخدهم

طبعا تفرح وتروح تركب تلاقي الناس كلها تذهب الي باب العربيه وكأنها ذاهبه الي باب الجنه
لحد ماتنتهي من هذه (العركه) وتدخل الي العربيه بسلام وربنا بيحبك لو هدومك ما تقطعتش

سعات حظك يقع انك تكون جنب الباب وطبعا هاتقفله

تلاقي السواق راح ناظر لك نظره الاحتقار والتخلف ويقولك( جرا ايه يا باشمهندز) براحه علي الباب في ايه
تقوله لامؤاخذه ياسطي اصلي لسه مافقتش وتقوله صباح الفل وتديلو الاجره
يروح واخدها منك وفارد الفلوس في ايدو ورافعهالك وباصصلك في المرايا الوسطانيه
ايه يا استاذ هو حضرتك اول مره تركب عربيات
تقولو
ليه ياسطي يقلك الاجره بقت بجنيه تقولو ياسطي انا بركبها كل يوم كده يقلك
لا ياعم اسأل اي حد وينتهي بكم الامر الي انك تطلع الزياده وتديهالو

وتقول في نفسك هاعمل ايه يعني ماهو ده العادي

وطبعا لو ركبت مترو فا ربنا يكون في عونك لان في حجات بتحصل في المترو تجعل الولدان شيبا
خد عندك واحد ييجي يقف ويسند عليك ومايدكش اي انتباه وتقول عادي
خد عندك واحد ييجي يقف وشو في وشك ويتهافت خروج الانفاس في وجهك الي ان يصبح وجهك مشبرا بنفسه
خد عندك واحد طالع عندو برد وينشر فيرس البرد في عربه المترو بالكامل
خد عندك خد عندك وطبعا من يركب المترو يعلمون ذلك علم اليقين
ومن لم يركب المترو فعليه بخوض هذه التجربه
وتنزل من المترو وتقول هاعمل ايه يعني ماهو ده العادي

وبعد كل هذا التعب الشاق والمحاولات والعصيبه
تبدأ يومك العملي وقبل البدا فيه تكون قد استنفزت جميع طاقتك الذهنيه والعصبيه
تدخل عملك سواء مكتب او كليه او غيره
تجد رئيسك في العمل اول ماشافك نظر لك نظره الخاطيء والعاصي وبصوت يحسسك بالخطيء ويقول لك
الساعه كام في ايدك يا استاذ اتأخرت خمس دقايق
تقولو معلش يافندم الطريق وتحكيلو
وبالطبع سوف يعتبرها (اسطوانات مشروخه بتتقالو كتير) ويقول لك ماحنا كلنا جايين من الطرق احنا كمان
وهو طبعا بييجي متأخر زيك زيو الا في حاله ان الظروف تساعدو
وسيكون رد فعله في غالب الاحيان خصم يوم لك او (طردك) او يتسبب في اي شيء يجعلك تسند راسك علي يديك وتقول
ليه بس كده هاعمل ايه يعني

تخرج من شغلك او عملك او جامعتك
لتجد الطريق مغلق تماما وكأنه هاتف رجل لم يدفع فاتورته منذ سنتين
ومقفول قفله وكأنه (كالون باب مصدي بقالو عشر سنين)
ومعقود عقده ضفيره شعر فتاه شعرها مثل اللوف البلدي

وطبعا السواق اعد هايموت من الحر وعمال يسب ويلعن
تقوله مش كده يسطي يقلك (ياعم يعني انت مش شايف خليك فيحالك والنبي يا استاذ لو مش عاجبك انزل)
ولو السواق لاحظ نرفزه الركاب قد يصل به الامر لطردهم جميعا من العربيه ويقول (يله ياجماعه اتفضلو انزلو انا مش طالع)

وفي الاخر تقول وانا هاعمل ايه يعني


تروح بيتك تلاقي الجيران ماسكين في بعض وهب طلعت المكانس وهب اتحدفت الجرادل
وقليل انك ماتخدلكش جردلين علي دماغك نتيجه (لسوء التنشين لدي المواطنين )

وتدخل بيتك تقول وانا هاعملهم ايه يعني


تدخل بيتك سلام عليكوم ها ياجماعه في اكل ايه

اول سؤال سيختر لهم علي البال (ايه اللي اخرك )
اهو المواصلات و الزحمه وكده

طيب مافيش اكل النهارده ماعملناش
تقوم تضربلك اي حاجه في بقك وتسد جوعك وخلاص

وتقول ماقدرش اعملهم حاجه عادي يعني


تخرج من البيت باليل وتقول اروح انا وصحابي نتمشي شويه
وتروحو الكورنيش ولا اي حته تعدو في الهواء الطلق

تجد فتاه لم تبلغ من العمر سن الرشد تجلس مع شاب متأمرك المظهر (متسيبك ) قصه الشعر (متسقط) البنطلون

تقول عادي همه في حالهم واحنا في حالنا

ومابك الا ان تسمع صوت ضحكه (مطرقعه) ليس لها اي صله بفتاه لم تبلغ سن الرشد

تتسبب لك في دق طبله ودنك علي عشره ونص

تروح قايل لالا العمليه تطورت يلا نمشي

وتقول عادي

تروح البيت وتقول ماحلي النوم ما اجمله

تذهب الي سريرك لتخلد الي النوم
اذا كنت في الصيف فلا مفر من اقامه بعض الحروب والمباحثات مع جيش الناموس الذي لاينفك عنك طوال ساعات النوم
وطبعا في بعض الاوقات يطلب جيش الناموس المساعده من بعض كتائب الذباب التي تتسبب لك في هدم قواعد البنيه التحتيه
للنوم عندك

واذا كنت في فصل الشتاء فلا مفر من اجراء بعض الساعات لكي تشعر بالدفئ وقبل هذا بتجيز الغرفه تجهيز شامل لمنع اي سرسوب هواء يدخل لك

وبرضو تقول عادي منا هاعمل ايه



وينتهي
يومك بعد كل هذا العناء وطبعا كل هذا باختصار شديد جدا ومن يريد مشاهده
هذه الامور فعليه بالتوجه الي المواصلات في ميعادي ذهاب واياب الموظفين
للعمل اولا
وبالتالي الذهاب للعمل متأخر وايضا عليه الذهاب الي اي منطقه هادئه باليل وسيجد.......



احم احم ايه اللي انا بقوله ده


معلش بقي ماهو ده العادي

ياعينى عليك يا مواطن كنت فى عهده مطحوووووووووون
ربنا يستر فى عهد ابنه ........

مشكور لمرورك