تم ترقية المراقب أمير بكلمتى والمراقبة ملكة الاحزان الى رتبة نائب مدير وذلك للأرتقاء بمستوى وحالة المنتدى

...نقاحات...

تقوم للحياةفى وقت الظهيره ،تعتد على ما تبقى فى ساعات النهار
تسترسل فى التفكير الى ما ترتاح الى عمله
على "الكنبه قدام التى فى "
مج كابتشينو او قهوة سادة على الصبح "ومعرفش ليه هى بتتطلب معايا كده"!!
او على النت او الفون على ما قدر ما نستطـــــــــــيع
نمشى فى شوارع المدينه إلتقاطاً للانفاس او نداوى حرجاً
او ربنا يفتحها علينا ونعمل"شوبنج"
يمر الوقت سريعاً نحس بنفس الاحساس قبيل الغروب
كل يوم بدقائق وتحس انها ما تبقى فى ساعات طويله من سنوات عدت وراحت
يدعوك اصحابك للعشاء "عزومة مراكبيه" وكالعادة نرفض دا واجب علينا اصلا
نتواعد باللقاء ولا نأتى فى الغالب ،مقابلات اخرى ولكن فى عالمنا الافتراضى "الفيس بوك"
تحس ببعض الراحه وبعض الاستمتاع
ثم دوار سريع وصداع كبير ويأتى دور القهوه السادة لنسهر مجدداً او ننام لا يهم !
نقراً ما نرى نتابع ما نشاء ،ليس هناك وقتاً ليلاً للمذاكره او لمثلها من الضروريات كما يراها الاخرون
لانها بالعربى كده الشئ المناسب فى الوقت المناسب هنذاكر ليه ولسه الامتحان معاده مجاش
وهو هو نفس الغشاء الذى لا نرى منه ما يحيط بنا
هى دوامة لا نراها او نحس بها غير اوقات الضيق ولا نجد ما تعودنا على فعله مع الايام
نبكى قليلاً حتى يضيع ذلك الشعور
او نخرج نتطلع فى خلق الله
وكــــــــــــلة ايه ؟؟؟ -بيعدى ..

على جانب اخر .......
فى المكان اللى بنسميه المخروبه قصدى الكليه
أتى الى هناك كثيراً منذ حوالى تلات سنوات ،لا يمكن اكتر
معلش بقه مشغوليات كتير فمش فاكر !!
انسجام رائع ،دا ايه الانضباط دا..
مكان محفوظ ..طبعاً مقعد خاص ولكنه يتغير بشكل مستمر
حيناً اجد نفسى فى اقصى اليمين وأخريات فى الوسط وبين الامام والخلف تمر ساعات طويله
قضيتها على مدار وجودى هنا فى محاولة للفهم وللاستيعاب
هنا اكثر مكان فعلى احس فيه بالضيق ..حقيقى ماتستغربش
أمتلى بالضيق لآكثر مما يمكن للنفس ان تمتلئ ورغم ذلك ارجع اليه فى الاسبوع لاكثر مما ارجع الى البيت ..عشان يعرفوا انى بكافح
كلها محاولات مجرد وظايف فارغه بنشتغلها احنا على هيئه كارنيهات
بدل فاقد للقعده على القهاوى
لو كان الواحد اتعلمله صنعه كان احسن !!
غالباً لا اتى لهنا من اجل عيون من يقف امام المدرجات
بل لعيون اخرى تتزين خصيصاً لتأتى هى ايضاً لهذا المكان!!
فيهم الخير ..حاسين بالشباب فى الصيف بيرطبوا وفى الشتا بيدفوا
لامؤاخذة مش قصدى ولا حتى قصدى هو مين مش عارف يعنى
طبعاً عشان مش اكون لبخت فى الكلام هو فيه ناس محترمه مفيهاش كلام ........
المهم المهم المكان دا من بره تلاقيه حاجه كبيرة
قصدى طبعاً مقارنةً بالمدرسه اللى كنا نبروحها لما كنا صغيرين
مش للجامعات التانيه بلا وكسه !!
بس من جوا هتلاقى الهوا جايلك من كل مكان بينقطع بس لما تدخل المدرجات
ودا بيفسر انا ليه مش بحضر
لانى تقريبا ببقى محتاج هوا عندى كرشه نفس اعمل ايه يعنى اموت مثلاً !
من يتحركون اكثر مما يسكنون بل من الواقفين اكثر من الجالسين
وطبعاً العائدون غالباً بيبقوا حتى اكتر من المستجدين !!

البركه فى الدكاتره بيحبونا اوى ع فكرة
وتلاقى واحد يقولك بحب الالتزام والسكوت وانا بتكلم
الطالب لازم يكون قدوة دا دخل جامعه
ولما يلاقى حس يقولك "اوعوا تفكروا انى سهل دانا صايع قديم"
شوفت بقه يبقى من الواجب اننا نتخدك كقدوة ونبقى زيك ع الاقل
مستكتر علينا شويه شغب يعنى ..يااااه على الانسان لما بيحب نفسه ياااه
خصوصا بتاع السياسه دا قال ايه كنا عاوزين نطلعوه بره
بره مين ياعم حد يسيب التكيف ويطلع بره
الموضوع بقه اننا اللى فى الاخر اللى طلعنا بره
وسبناه جوا لوحده !!!!
المشكله فى الزمن دا ان كل واحد يجى عليه اعتصام او مظاهره
اسمه يبقى عكس دا خالص
حاجه غريبه فعلا لانه اسمه منافى تماماً للى حصل
ومش عايز افتح فى القديم بقه واسيح
خلى الطابق مقفول مش متسور لان الحمد لله
"كل شئ انكشف أنه بان" !!

بس حصل تطور الحقيقة يعنى حد كان يصدق
ان عندنا يحصل اعتصام
ياراجل !! دا لو بتوع الانابيب نفسهم وقفوا اعتصام
ماكناش برضه حد هايصدق اننا نعملها
مش بقولك تطور !! زى بالضبظ التطور اللى حصل للحاجه الساقعه
بقا فيه بالجيب دلوقتى يعنى تمشى كده وتحطها فى جيبك
ولا حد حاسس بحاجه انت بس لوحدك اللى هاتحس ...بساقعه!!!
نقعد كل سنه جديدة نفتكر بقه "فاكر ياض لما دخلنا هنا اول مرة"
فاكر النفخه اللى فى بتوع سنه رابعه فاكرينا لسه تلاميذ
وحياة(....) لهنعرفهم احنا مين
تلف الدنيا بينا وتتبدل الادوار ونضحك عليهم
بتوع سنه اولى دول لذاذ اوى يخربيت طعامتهم
واحد بيسألنى هى اولى تانى فين !!!
المشكله بقه فى الشويه اللى فى الاخر
بيبقوا على الشباك ولا كأنك ع البحر
يجى شويه بوابين بقه يقولولك اتفضل تحت
مش عارف مايكونش هايعملوا مؤتمر
ولا كليه ابوهم هى لو مكناش احنا نقف هنا اومال مين يعنى
اللى المفروض يقف وماشاء الله
لسان طويل سواء فى البوابه او المكاتب
صدق اللى قال عليها كليه "النجاره" عباره عن شويه
كراسى قاعدين على كراسى
وماتقوليش اهدى انا طافح منهم اساساً

طبعاً كل دا كان مع نفسى اللى هايقرا هايقول دا مجنون
بس تصدق ناس كتير اوى هاتحس بيا ، ايوا يعنى كليه وناس بظروفنا دى
منتظر ايه يقولوه يعنى ، مستقبل مجهول سواء لينا كإنسان

يا اما وطن اه" الوطنن" بتاعنا اللى حصلت فيها ثوره دى
مش عارف الناس لسه مبلمة لما يجى سيرة اعتصام ولا نروح ميدان
اصلها عامله زى الكنافه حلاوتها كانت فى رمضان بس
اى وقت تانى بتبقى مالهاش معنى
فيها ايه نستنى لحد ما الانتخابات تحصل اللى هايحصل يعنى
غاويين كل يوم بلاوى تنطلنا توقف عجله الانتاج
يا جماعه ميت مره اقول عجله الانتاج لو فرقعت مش هانعرف نجيب عجله تانيه
الطريق صحرا نلاقى فين ميكانيكى دلوقت!!!!
وبعدين يستاهلوا اللى بنضربوا دول
فى حد يقل ادبه على ولى امره
تقول ايه الدول اللى جنبنا بقا معرفناش نربيهم !!
قلة ادب وبعدين هما اللى راحو هناك عملوا ايه يعنى
اكلوا شويه كنتاكى وترمس وفول سودانى وروحوا تانى
هاتتعب صوتك وتقل منامك وتطلع فى عيون الناس بلطجى
يبقى ليه التعب خلينا متخافش بكره كل شئ هايبقى تمام
كفاية المجلس وقف معانا ياراجل

يعنى هايعمل ايه ولا ايه شايل حمل تقيل عليه
نشيل عنه شويه مش نقوم نزوده اكتر ، يعنى حبه عليهم وحبا علينا
فيها ايه لو يمدوا كمان شويه اهو عشان "الاستكرار"
يعنى عاجبك حال الاقتصاد فى البلد وبعدين ماهو تمام دلوقتى
حد جه اشتكالك ولا انت عاوز صوت وخلاص
الثوره خلاص نهدى بقه ونشتغل
مع انى مش فاهم المفروض نشتغل ايه بس هانشتغل
على الاقل يوم مانلاقيش شغل
ادينا بنتشغل نفسينا !!!
وعلى كده الحال مبرر قوى الاستكرار دا
قال يعنى قبل كده اصلا كان فيه استكرار عشان لما تتعكس
يبقى فيه

اضحك احيانا على حاجات كتير يعنى الاعلام مثلا
تجيلك اعلان ان البلد خلاص بقت تمام
وهانبنى وكل بيان قبليه اغانى وطنيه
والعجيب ان هى هى الاغانى اللى كانت معموله عشان المنتخب
طب دلوقتى المتخب شد حيله وخرج طب الاغانى دى لمين انا عايز افهم
وتلاقى تانى يوم بلاوى بتحصل تتقفل قناة ايه
ماسبيرو مش عارف بيحصل فيها ايه
هى الناس دى فاضيه مورهاش مصالح ولا ايه
بس دا كان زمان شويه انت قديم كده ليه
شكلك مش بتقرا التليفزيون ولا بتسمع الجرايد!!
لا ما الوضع اتطور دلوقتى خااااالص

تعرف الجيش اللى رفض انه يضرب نار على التحرير اهو عملها ومد ايده
بشويه المقاطيع بتوع الامن المركزى على شويه من الجيش
اصل اشمعنى هما مضربوش!! ، المشير برضه من حقه يشوفله يومين
يعنى هو احسن من بشار الاسد فى ايه
رادل من ظهر رادل عرف يربى شعبه لا يطلعلك فى خطاب ولا يعملك قرارات
انما اتبع اسلوب" اللى يخرجنى ....يفرجنى"
وتقريبا نفس المواويل بتاعت يوم25 ناس تيجى تشتم فى المتظاهرين
دول شويه "صيّع" دى بلطجه عايزين يخربوا البلد
عايزين تشيلوا مين دا كفايه ان الجيش حماكم اساسا
هنلاقى مين غيره كبير ويحكم عايز تعمل خناقات فى البلد
هما شويه الاخوان اللى عملوا الكلام دا عشان مش عايزين الانتخابات تتعمل
لما لقى المجلس هايعمل دستور من غيره قال لالالا
مش ممكن امال كل اللى بيحصل دا ليه لا انتخابات بقه ولا نيله
و لا فارق بقه ناس بتموت ولا اللى بينصاب ولا اى حاجه

ماهو كله بقه حصرى على التليفزيون المصرى ، منتظر ايه
من مجموعه اتربت على السلبيه وعلى انهم مايحسبوش الحكام على اى اخطاء
عادى واعتيادى المهم الانتخابات مش مهم بقه اى حاجه تانيه
-يا بنى يا حبيبى انت عارف الجيش عاوز ايه ؟؟
دا عاوز يطول ويبقى فوق القانون
- انت مين اللى قالك كده دا احنا فى استقرار اهه
جايين قدام الانتخابات ويعملوا كدا ليه اشمعنى دلوقت
بقه احسن حاجه انك تمشى وتوقف زرار الصوت والاعصاب
وتروح بعيييييد تفكر المفروض تعمل ايه حتى لو لم تملك غير الدعاء

سيبك بجد بكره هايبان كل شئ
وهايطلع الضحايا دول رمز للثوره وكل واحد عمل مصيبه
هاتهد فى دماغه لان ربنا مش بيسيب حق حد
هى سلسله وبتدور على رقيه اى حد مش صح فى البلد دى
بس المهم نثبت على الصح والحق مهما كان تمنه غالى
ماهو عشان بعد كده نفوق ونماطلش اى حد

اعذرنى تقريبا اتلسعت مع هو اللى بيحصل اصبح المجنون والعاقل
فى مركب واحدة شوبه العاقل يتكلم والمجنون مايفهمش
ولما المجنون يتكلم العاقل مايسمعش
بس هاتفرج إن شاء الله ، انا امى بتقولى كدا فى كل زنقه بتحصل
يعنى البلد دى اخرها يحصل فيها ايه يعنى
الشعب هايموت مثلا وماله على الاقل كسافه سكانبه اهى تيجى بفايدة
وبعدين هما هايروحوا فين دول هايبقوا شهداء
حد يكرة نهايته يبقى شهيد بغض النظر بقه
ان كان حقه هايرجع ومش باينه عن اهله ما رجع
هو فى الاخره كل واحد بياخد حقه كويس
على راى عادل امام "هايروحوا من ربنا فيــــــــــــــن؟؟""

الواحد كتير اوى بيبقى نفسه يتكلم باللغه العادية اللى
متعودة عليها الناس مش شرط قوالب فنيه
أو سطور مزخرفه باروع الاوصاف والكلمات
المهم يعرف يقول ويعبر ،ممكن تكون دى حاله وهاتعدى
وهى طبعاً محصلتش قبل كدا بس اهه
مش هانخسر حاجه انا بعد كده هاتجه للحوار دا
يوم ما اعرفش اوصف واقلبها خواطر تبقى بالطريقه دى
باعتذر ،هو بس العشم ان الاقى حد يستوعبنى

مع كامل اعتذارى مرة اخرى لما كتبت بس هى كانت حاجات ناقحه عليا ودى حاجه بسطيه منهم
زى ما قولت فى العنوان مجرد .......
.....نقاحـــــــــــــــات...........

[ندعوك للتسجيل في المنتدى أو التعريف بنفسك لمعاينة هذه الصورة]

E7SASS MYT كتب:: [ندعوك للتسجيل في المنتدى أو التعريف بنفسك لمعاينة هذه الصورة]

طاااايب ....

شكرا لمجهودك كتير

sokr7oda كتب:: شكرا لمجهودك كتير

الشكر لله وحده

شكراً لمرورك الطيب

سلمت أناملك الذهبية على ماخطتة لنا

ملكة الاحزان كتب:: سلمت أناملك الذهبية على ماخطتة لنا

تسلمى لحضورك الجميل فى صفحتى بارك الله فيكى

تم ترقية المراقب أمير بكلمتى والمراقبة ملكة الاحزان الى رتبة نائب مدير وذلك للأرتقاء بمستوى وحالة المنتدى

اقتراحك يهمنا

نقاحـــــــــــــــات